Իրանը ողջունում է Հայաստանի և Ադրբեջանի միջև խաղաղության պայմանագրի շուրջ համաձայնությունները, երկու երկրներին խրախուսում ենք, որ հնարավորինս շուտ ստորագրեն վերջնական փաստաթուղթը. Երևանում, Արարատ Միրզոյանի հետ համատեղ ասուլիսին հայտարարեց Իրանի Իսլամական Հանրապետության արտաքին գործերի նախարար Սեյեդ Աբբաս Արաղչին:
«Տարածաշրջանի երկրների անկախությանը և տարածքային ամբողջականությանն աջակցում ենք և դեմ ենք միջազգային սահմանների ցանկացած փոփոխության, դեմ ենք աշխարհաքաղաքական ցանկացած փոփոխության։ Սա Իրանի կայուն դիրքորոշումն է»,-ասաց իրանցի նախարարը։
Նա նշեց, որ տարածաշրջանում բոլոր խնդիրները պետք է լուծվեն տարածաշրջանի ներսում՝ երկխոսության և դիվանագիտության միջոցոցով՝ առանց ուժի կիրառման։
Իրանի արտգործնախարար Սեյեդ Աբբաս Արաղչին խուսափեց ուղիղ պատասխան տալ այն հարցին, թե կոնկրետ ինչ է պատրաստ Թեհրանն անել, եթե Ադրբեջանը փորձի բռնի ուժով «միջանցք» բացել Հայաստանի Սյունիքի մարզով։
Արտգործնախարարը կրկնեց, որ Իրանը կողմ է տարածաշրջանային խնդիրները երկխոսության և դիվանագիտական ճանապարհով լուծելուն և դեմ է հակասությունների լուծմանն ուղղված ռազմական քայլերին։
Նախարարը նշեց, որ տարանցիկ ուղիները պետք է գործեն՝ հարգելով երկրների իրավասությունը, տարածքային ամբողջականությունը և օրենքները։
Ցանկացած այլ ճանապարհ անընդունելի է, ընդգծել է Արաղչին։
