Ամերիկյան Foreign Affairs պարբերականը անդրադառնալով Իրան-ԱՄՆ հարաբերությունների բարդությանը, գրել է. «Արեւմտյան պաշտոնյաները մտահոգություն են հայտնել, թե արդյոք Իրանի նոր նախագահ Էբրահիմ Ռաիսին կսկսի բանակցություններ իր երկրի եւ համաշխարհային խոշոր տերությունների միջեւ՝ 2015 թվականի միջուկային գործարքը վերակենդանացնելու համար: Նրանք անհանգստացած են, որ Ռաիսին կհետաձգի բանակցությունների վերսկսումը, և որ իր կառավարությունը անիրագործելի պահանջներ կներկայացնի, երբ բանակցությունները վերջապես վերսկսվեն¹»:
Պարբերականը շարունակության մեջ հավելել է. «Իրականում, թվում է, թե Իրանի նոր կառավարությունը վճռական է տրամադրված բանակցությունները շարունակելու հարցում և հավանաբար կշարունակի բանակցությունները: Թեհրանը կշարունակի աշխատանքը բանակցություններն առաջ մղելու ուղղությամբ, որոնք տեղի են ունեցել ապրիլից հունիս ընկած ժամանակահատվածում՝ բանակցությունների վեց փուլերի ընթացքում: Բայց եթե Միացյալ Նահանգներն ու Իրանը չկարողանան ճշգրտել իրենց դիրքորոշումները՝ իրենց միջև եղած անջրպետը լրացնելու համար, նրանք կմնան փակուղու մեջ: Սա պոտենցիալ աղետալի հետևանքներ ունի ինչպես այդ երկու երկրների, այնպես էլ Միջին Արևելքի համար: Եթե նրանք այլ արդյունք են փնտրում, ապա նրանց այլ մոտեցում է պետք»:
«Այս վեճի հիմքում երկու կողմերի սխալ պատկերացումն է: Բայդենի վարչակազմը վերաբերվում է Իրանին այնպես, ինչպես վարվում է հակառակորդ այլ գործընկերների հետ: Մինչդեռ Իրանը վիրավորվել է համաձայնագրից Դոնալդ Թրամփի դուրս գալուց և կոշտ պատժամիջոցներ կիրառելուց, և իրեն տեսնում է որպես զոհ: Մյուս կողմից, Իրանի ղեկավարությունը կարծում է, որ ժամանակն անցնում է իր օգտին: Նա կարծում է, որ Վաշինգտոնը նախկինում խիստ պատժամիջոցներ էր սահմանել Իրանի դեմ, սակայն Իրանի տնտեսությունը գոյատեւել է եւ ընդլայնվում է, որպեսզի Թեհրանը կարողանա բանակցությունների ժամանակ առավելություն ունենալ: Հաշվի առնելով Թեհրանի միջուկային ծրագրի կտրուկ աճը, իրանցի պաշտոնյաները կարծում են, որ լավ հնարավորություն ունեն ավելի մեծ լծակներ կառուցելու և ավելի լայն զիջումներ ստանալու Արևմուտքից», – նշում է ամերիկյան պարբերականը:
Հոդվածագրի համոզմամբ, «հետևանքները տարածաշրջանի համար սարսափելի կլինեն: Թեհրանի և Վաշինգտոնի միջև համաձայնության բացակայության դեպքում տարածաշրջանն ավելի շատ հակամարտության և անկայունության մեջ կընկնի: Վաշինգտոնին սպասվում է նաև քաոսի միջանցք Աֆղանստանից մինչև Իսրայելի սահման: Վիեննայի բանակցությունների ձախողումը հունից հանում է Բայդենի արտաքին քաղաքականության ավելի լայն օրակարգը, որը ձգտում է իր ուշադրությունը Միջին Արևելքից տեղափոխել գլոբալ խնդիրների վրա, ինչպիսիք են կլիմայի փոփոխության դեմ պայքարը և խոշոր տերությունների, հատկապես Չինաստանի հետ մրցակցությունը: Նախագահ Ջո Բայդենը կարող է նույնիսկ իրեն տեսնել Միջին Արևելքում հերթական զինված միջամտության շեմին, որից նա կտրականապես խոստացել է խուսափել»:
✍🏻 Հարութ Արթին Առաքելյան
➖➖➖➖
¹ https://www.foreignaffairs.com/articles/united-states/2021-09-21/how-save-iran-nuclear-deal
➖➖➖➖
©️ #ՓԱԿԱԳԻԾ
