Պաշտոնական Թեհրանը հուսով է, որ Սյունիքի մարզի սահմանամերձ գոտիներում եւ հատկապես Կապան-Գորիս ճանապարհային հատվածում առաջացած վերջին տարաձայնությունները կկարգավորեն այնպես, որ չի խափանվի տրանսպորտային ուղիների վերաբացման եւ ապաշրջափակման նպատակի իրագործումը: Այս մասին «Արմենպրես»-ի հարցմանն ի պատասխան հայտնել են Հայաստանում Իրանի Իսլամական Հանրապետության դեսպանությունից:
Իրանի դեսպանատնից ասել են, որ Հայաստանի եւ Ադրբեջանի միջեւ նոր սահմանազատման հարցի՝ օրակարգ մտնելուց ի վեր Իրանը լիահույս է եղել, որ կողմերը հրատապ կերպով կհասնեն այնպիսի փոխընդունելի լուծման, որը կապահովի Հայաստանի եւ իր հարեւանների միջեւ հարաբերությունների բնականոն ընթացքը՝ նվազագույն հետեւանքներով: Նաեւ հիշեցրել են, որ տարածաշրջանում հաղորդակցության ուղիների վերաբացման եւ ապաշրջափակման հարցը եղել է Հայաստան-Ռուսաստան-Ադրբեջան ձեւաչափով ընդունված եռակողմ հայտարարությունների հիմնական կետերից մեկը:
Թեհրանը հուսով է, որ Հայաստանի եւ Ադրբեջանի միջեւ ընդհանուր սահմանազատման հետ կապված տարաձայնությունները կլուծվեն խաղաղ մթնոլորտում՝ առանց որեւէ լարվածության կամ խափանման հաղորդակցության ուղիներում:
«Հուսով ենք, որ կողմերը՝ Սյունիքի մարզի սահմանամերձ գոտիներում եւ հատկապես Կապան-Գորիս ճանապարհային հատվածում առաջացած վերջին տարաձայնությունները կկարգավորեն այնպես, որ չի խափանվի տրանսպորտային ուղիների վերաբացման եւ ապաշրջափակման նպատակի իրագործումը: Ցավոք, վերջին երկու օրերի ընթացքում ականատես ենք լինում այն բանին, որ Սյունիքի մարզում տեղի ունեցած վերջին իրադարձությունների հետեւանքով այս ճանապարհով երթեւեկությունը խաթարվել է, ինչը խնդիրներ է առաջացրել ոչ միայն Հայաստանի քաղաքացիական բնակչության բնականոն կյանքի համար, այլեւ Իրանից Հայաստան բեռնափոխադրում իրականացնող մի շարք իրանական բեռնատարների համար: Այս ճանապարհի 21 կիլոմետրանոց հատվածում առկա իրավիճակի բարդությունից ելնելով՝ պահանջվում է, որ կողմերը բարիդրացիության սկզբունքի շրջանակներում ջանքեր գործադրեն՝ հաղորդակցության եւ երթեւեկության բնականոն ընթացքը ապահովելու ուղղությամբ, մինչեւ այս առումով ճշգրիտ եւ կոնկրետ իրավիճակի հասնելը: Հետեւաբար, մենք դեռ հույս ունենք, որ Հայաստանի եւ Ադրբեջանի միջեւ ընդհանուր սահմանազատման հետ կապված տարաձայնությունները կլուծվեն խաղաղ մթնոլորտում՝ առանց որեւէ լարվածության կամ խափանման հաղորդակցության ուղիներում», – նշված է Իրանի դեսպանության պատասխան նամակում:
Ինչ վերաբերում է հաղորդակցության բնականոն ընթացքի երաշխավորման կարեւորությանը՝ իրանական կողմն ընդգծում է, որ իրենք մշտապես հայտնել են իրենց տեսակետները Հայաստանի իրավասու մարմիններին:
«Լիահույս ենք, որ Կապան-Գորիս երթուղու շահագործման շուրջ առկա տարաձայնությունների լուծման ուղղությամբ ընթացող բանակցություններին զուգահեռ՝ սրընթաց կերպով կընթանան նաեւ այլընտրանքային երթուղիների բարելավման ու զարգացման աշխատանքները, որպեսզի պայմանները ինչպես Հայաստանի քաղաքացիների, այնպես էլ Հայաստանի հետ մեր առեւտրային հարաբերությունների տեսանկյունից՝ վերադառնան իրենց բնականոն հունին», – «Արմենպրես»-ին ասել են Իրանի դեսպանությունից:
ՀՀ ազգային անվտանգության ծառայությունը տեղեկացրել էր, որ օգոստոսի 25-ին ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Ավելի ուշ, Մարդու իրավունքների պաշտպան Արման Թաթոյանը ահազանգեց, որ ադրբեջանցի զինծառայողները փակել են նաեւ ՀՀ Սյունիքի մարզի Գորիսից Որոտան տանող ճանապարհը:
Օգոստոսի 27-ին ՀՀ ԱԱԾ-ն տեղեկացրեց, որ ՀՀ ԱԱԾ սահմանապահ զորքերը եւ ռուս սահմանապահները բանակցություններ են վարում ադրբեջանական կողմի հետ Գորիս-Կապան միջպետական ճանապարհի՝ օգոստոսի 26-ից փակված Գորիս-Որոտան եւ Շուռնուխ-Կարմրաքար հատվածները վերաբացելու վերաբերյալ։
Օգոստոսի 27-ին վարչապետ Նիկոլ Փաշինյանը կառավարության նիստում հայտարարեց, որ Ադրբեջանի զինված ուժերի կողմից Կապան-Գորիս միջպետական ճանապարհի փակումը հակասում է 2020 թվականի դեկտեմբերին ձեռք բերված պայմանավորվածություններին:
Ադրբեջանի կողմից միջպետական ճանապարհի փակումը անդրադարձել է նաեւ Իրանից կատարվող բեռնափոխադրումների վրա:
