Ի տարբերություն իշխանականների՝ Կարեն Մկրտչյանի սիրտը ցավում է Հայրենիքի ամեն մի բեկորի համար, դրա համար էլ իրեն թույլ է տալիս իրերը կոչել իրենց անուններով. Գեղամ Մանուկյան

Ալեն Սիմոնյանը ո՛չ բարոյական, ո՛չ իրավական իրավունք չուներ թքելու կանադահայ Կարեն Մկրտչյանի վրա։ Իսկ թիկնազորը, որն այսօր Ալեն Սիմոնյանի սափրագլուխ «առխաննիկներն» են, վաղը կարող է մեկ ուրիշինը լինել։ Այնինչ նրանք նույն Կարեն Մկրտչյանի աշխատավարձի, պետությանը վճարված հարկերի հաշվին են աշխատավարձ ստանում, և ոչ թե նրանց Ալեն Սիմոնյանն է անձնապես վճարում, Azg.am-ի թղթակցի հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով երեկ կասկադում տեղի ունեցած հայտնի միջադեպին։

Երբ ընդդիմադիր պատգամավորին տեղեկացրեցինք, որ մեզ հետ զրույցում իշխանական պատգամավոր Գևորգ Պապոյանը, անդրադառնալով նույն միջադեպին, տարակուսանք էր հայտնել  թե «Հայաստանի Հանրապետությանը հարկեր չվճարած, ՀՀ քաղաքացիների ընտրությունը չհարգող, ՀՀ բանակում չծառայած կամ դրան համարժեք ծառայություն չմատուցած և Հայաստանի Հանրապետությունում երեխաներ չմեծացնող Կանադայի քաղաքացին ի՞նչ իրավունք ունի ԱԺ նախագահին որակումներ տալ», Մանուկյանն ասաց.

«Գևորգ Պապոյանենք թող իրենց մանկուրտ կոլեգաների մասին խոսեն. Կարեն Մկրտչյանը բազմազավակ ընտանիքի հայր է, ամբողջ ընտանիքով տարիներ առաջ Կանադայից տեղափոխվել և հաստատվել է Հայաստանում»։

Հարցին՝ Մկրտչանն իսկապե՞ս ՀՀ քաղաքացիություն չունի, ինչպես պնդում է Գևորգ Պապոյանը, ընդդիմադիր պատգամավորը նկատեց՝ ինքը դա չի կարող ասել, միայն կարող է ասել, որ նա հայ մարդ է։

«Կարեն Մկրտչյանը հայ մարդ է, որ ապրում է Հարենիքում, Հայրենիքի կյանքով, Հայրենիքի հոգսով, և նրա սիրտը, ի տարբերություն իշխանականների, ցավում է Հայրենիքի ամեն մի բեկորի համար։ Դրա համար էլ նա իրեն թույլ է տալիս իրերը կոչել իրենց անուններով։

Ինչ վերաբերում է Ալեն Սիմոնյանի արարքին, իրավապահները պարտավոր են անդրադառնալ դրան։ Բացի այդ՝ երբ Ալենը հասկանում է, թե հանրային ինչ ընդվզում կա, փորձում է սլաքներն այլ կողմեր ուղղել՝ շրջանառության մեջ դնելով Նիկոլ Փաշինյանի որդու վրա հարձակման փաստը, որի մասին, սակայն, ոստիկանություն ասում է, որ ահազանգ չի ստացել։

Իրավապահները պարտավոր են Ալեն Սիմոնյանի հայտարարությունը որպես հանցագործության մասին հաղորդում ընդունել և քննություն տանել։ Թող պարզվի, թե ինչ է եղել»,- ասաց Գեղամ Մանուկյանը։

Հիշեցնենք, որ երեկ ԱԺ նախագահ Ալեն Սիմոնյանի մասնակցությամբ միջադեպ է տեղի ունեցել Կասկադում. խորհրդարանի նախագահը թիկնապահներին կարգադրել է բռնել իրեն «դավաճան» անվանած հայրենադարձ Կարեն Մկրտչյանին, ինչից հետո մոտեցել է վերջինիս, հայհոյանք հնչեցրել և թքել է նրա վրա։