Իսրայելի ներկայությունը Սիրիայում այլևս արդարացված չէ. Ահմեդ ալ-Շարաա

Իսրայելի պաշտպանության բանակի (IDF) գլխավոր շտաբի պետ Հերզի Հալևին ասել է, որ իսրայելական բանակի բոլոր գործողությունները Սիրիայում ուղղված են բացառապես Իսրայելի անվտանգության ապահովմանը։

Նրա խոսքով՝ Իսրայելը չի ​​միջամտում այն ​​ամենին, ինչ տեղի է ունենում Սիրիայի ներսում, սակայն «ակնհայտորեն մասնակցում է Գոլանի բարձունքների համայնքներում բնակվող Իսրայելի քաղաքացիների անվտանգության ապահովմանը». Հալևիի խոսքը մեջբերել է ՏԱՍՍ-ը։

 «Մենք այստեղ ենք՝ պաշտպանելու Գոլանի բարձունքները, հյուսիսային Գոլանը և Հերմոն լեռը: Սիրիան ժամանակին թշնամի պետություն էր, նրա բանակը փլուզվել է, և իրական վտանգ կա, որ ահաբեկչական տարրերը կփորձեն հաստատվել մեր սահմանի մոտ: Մենք գործում ենք` վճռականորեն կանխելու մեզ մոտ ծայրահեղական խմբավորումների կուտակումը»,- ասել է Հալևին։

Հալևիի մեկնաբանությունները հաջորդել են Դամասկոսում իշխանության եկած զինված խմբավորումների առաջնորդ Ահմեդ ալ-Շարաայի (հայտնի է Աբու Մուհամեդ ալ-Ջուլանի մականունով) հայտարարությանը: Նա ասել է, որ Իսրայելի ներկայությունը Սիրիայում այլևս արդարացված չէ։

Ավելի վաղ ալ-Շարաան Syria հեռուստաընկերության եթերում դիմել էր միջազգային հանրությանը` դադարեցնելու «իսրայելական էսկալացիան» Սիրիայում։

Ալ-Շարաան ասել է, որ Իսրայելը խախտել է Սիրիայի հետ սահմանազատման գիծը Գոլանի բարձունքներում։

«Միջազգային հանրությունը «պետք է միջամտի և պատասխանատվություն ստանձնի այս էսկալացիայի համար», – ասել է Սիրիայի նոր իշխանությունների ղեկավարը՝ ընդգծելով «տարածաշրջանում իրավիճակի վերահսկման և Սիրիայի ինքնիշխանության  կարևորությունը»։