Իսպանիայի վարչապետ Պեդրո Սանչեսը Քենիայի նախագահ Ուիլյամ Ռուտոյի հետ համատեղ հայտարարության ժամանակ երկու անգամ այդ հանրապետությունը շփոթել է Սենեգալի հետ, հինգշաբթի հաղորդում է ABC թերթը։
«Կարծում եմ, որ Իսպանիան պոտենցիալ դաշնակից է շատ ոլորտներում, որտեղ մենք կարող ենք աշխատել Սենեգալի հետ՝ ապագա մարտահրավերներին դիմակայելու համար, որոնցից տուժում է մեր հասարակությունը», – առաջին անգամ սխալվել է Սանչեսը, գրում է թերթը։
«Այսպիսով, շատ շնորհակալ եմ, ինձ համար մեծ պատիվ է լինել առաջին միջազգային առաջնորդներից մեկը, ով այցելել է ձեզ Սենեգալի նախագահի կարգավիճակով»,- կրկին սխալվել է Իսպանիայի ղեկավարը։ Այստեղ նրան ստիպված է եղել ուղղել Քենիայի նախագահը։ «Ահ, այո, այո, կներեք, կներեք… Քենիայի հետ», – ուղղել է Սանչեսը:
Երեկ Իսպանիայի վարչապետը սկսել է իր երկօրյա շրջագայությունը, որի ընթացքում պետք է երկու կանգառ կատարի՝ Քենիայում եւ Հարավային Աֆրիկայում։ Երկու երկրների հետ երկկողմ հարաբերություններն ամրապնդելու նպատակով Սանչեսն առաջին անգամ մեկնել է աֆրիկյան մայրցամաք։
