Փաստաբան Րաֆֆի Ասլանյանի ֆեյսբուքյան գրառումը․ «Աթենք-Մյունխեն ինքնաթիռում ծանոթացա շատ ճանաչված մի գերմանացի պրոֆեսորի հետ, ով դասավանդում է Գերմանիայի, Չեխիայի և Թուրքիայի մի շարք համալսարաններում: Լինելով աշխարհի լավագույն թուրքագետներից մեկը՝ կատարյալ կերպով տիրապետում է Օսմանյան կայսրության և ժամանակակից Թուրքիայի պատմությանը, քաղաքական ու պատմական առաջնահերթություններին, թարգմանել է Օրհան Փամուքի մի շարք ստեղծագործություններ, ի թիվս այլնի՝ համահեղինակել է նաև «Խորհրդային Միության և նրա իրավահաջորդ պետությունների թյուրքական լեզուներն ու թյուրքական մշակույթները» վերտառությամբ գիրքը։
Բնականաբար շատ հաճելի զրուցակից էր, շատ լավ գիտեր նաև հայերիս, և ընթացքում կիսաժպիտով մի հարց տվեց՝ իսկապե՞ս ազգովի եք ցանկանում թուրքերի հետ հաշտ ու խաղաղ լինել, թե՞ թուրքական հետախուզությունն, այնուամենայնիվ, իր գործն արել է։ Հարցի ենթատեքստը հասկացա, բայց առանց պատասխանելու, ինքս էլ հարց ուղղեցի նրան՝ իսկ դուք ինչպե՞ս եք կարծում։ Պատասխանը շատ կտրուկ էր՝ իհարկե կարող եք, բայց այնպես, ինչպես Թուրքիայի տարածքում ներկայումս բնակվող հայերը։
Հ.Գ. Ըստ իս՝ նրա հարցի ենթատեքստը հետևյալն էր. ազգովի եք այդքան միամիտ, թե՞ հակառակորդի հետախուզությունն է ձեր համար ղեկավար նշանակել։ Սա ասում է մի մարդ, ազգությամբ ոչ հայ, ով անթերի գիտի թյուրքերին, նրանց նպատակները և բնականաբար թուրքական լոբբիստ է, իսկ մեր հայրենակիցներից ոմանք դեռ ապրում են պատրանքներով, ՀՀ ղեկավարի մասին չեմ էլ խոսում, քանի որ ներքուստ չեմ կարողանում փարատել այն կասկածը, որ նա այդ ամենն անում է ի սկզբանե պլանավորված, պատվիրված կերպով»։
