Իրավապաշտպան Նինա Կարապետյանցը բացարձակ այլ բան չէր սպասում, քան այն, որ Եռաբլուրում ոստիկանության կողմից բռնության ենթարկված զոհվածների ծնողների գործը կկարճվի, և պատասխանատուներն ու իրագործողները անպատիժ կմնան։
«Որովհետև սա մեր երկրում ավանդույթ է, որը տասնամյակներ շարունակ եղել է և դեռ պահպանվում է։ Ցավալիերոն սա շատ կանխատեսելի էր, և այստեղ զարմանալու որևէ բան չկա»,- Azg.am-ի թղթակցի հետ զրույցում ասաց իրավապաշտպանը։
Անդրադառնալով տեղեկություններին, որ ՆԳ նախարարը փորձել է հանդիպել զոհերի ծնողներին, սակայն վերջիններս մերժել են նրան, Նինա Կարապետյանը նկատեց՝ բռնության ենթարկված ծնողների հետ կոնտակտի պետք էր դուրս գալ հենց սկզբից՝ մինչև վերջիններիս Եռաբլուրում բռնությունների ենթարկելը։
«Պետք էր ճանապարհներ գտնել, ներգրավել հեղինակավոր մարդկանց, որոնք կկարողանային ծնողներին բացատրել իրավիճակը։ Ես բազմաթիվ տարբերակներ եմ առաջարկել, թե ինչ կարելի էր անել, բայց իշխանությունը գնաց ուժը ցույց տալու ճանապարհով։ Իշխանությունը ցույց տվեց, որ ուժ ունի և հարցերը կարող է ուժով լուծել։
Իհարկե, հասարակական կարգը պահպանելու համար առանձին դեպքերում ծայրահեղ անհրաժեշտություն կա ուժային միջոցառումներ ձեռնարկել, բայց զոհվածների ծնողներն այդ դեպքը չեն։ Եթե դու բռնության ես ենթարկում հերոսների ծնողներին, իսկ հետո գնում և խոնարհվում ես նույն այդ հերոսների շիրիմներին, դրա մեջ բարոյականություն, ողջամտություն և տրամաբանություն չկա»,- ասաց մեր զրուցակիցը։
Ըստ իրավապաշտպանի՝ բռնությոն գործադրած անձանց պատասխանատվության չենթարկելը շատ տրամաբանական է, որովհետև որոշում կայացնողը ոստիկանը չէ, նա ընդամենը հրահանգ կատարող է։
«Ավելին ասեմ. դա անգամ ոստիկանության որոշումը չէ։ Ես խորին համոզմունք ունեմ, որ դա քաղաքական որոշում է, որովհետև այդ ժամակաշրջանում իշխանությունը նպատակ էր դրել, որ իր առջև ոչ մի ճանապարհ չպետք է փակ լինի, և կապ չունի՝ կթքես մարդու վրա, կհրամայես ծեծել զոհված զինվորի ծնողին, ոտքով շուռ կտաս մարդկանց ապրանքը՝ սեփական ավտոմեքենան կայանելու համար, միայն թե հաստատես, որ իշխանություն ես և կարող ես անգամ օրենքով արգելված մեթոդներով գործողությունների դիմել և պատասխանատվության չենթարկվել»,- ասաց Նինա Կարապետյանցը։
Վերջում իրավապաշտպանը շեշտեց՝ անպատժելիության մթնոլորտում ոչ ոք ապահովագրված չէ իր հանդեպ ուժի կիրառումից։
«Իշխանությունների անպատիժ մնալը նշանակում է, որ հաջորդիվ շատ ավելի ցինիկ գործողությունների կարող են գնալ, որովհետև անպատժելիությունն ավելի ծանր հանցագործություններ է ծնում։ Ընդ որում՝ հանցագործությունները շատ ավելի բացասական բնույթ ունեն, եթե իրականացվում են իշխանությունների կողմից, որովհետև բոլոր հնարավորությունները նրանց ձեռքերում են։ ինչպես ասում են՝ մուրճն էլ, մեխն էլ իրենց ձեռքում է. ինչպես կուզեն,այդպես էլ կխփեն»,- ամփոփեց իրավապաշտպանը։
Հիշեցնենք, որ ԱԺ «Պատիվ ունեմ» խմբակցության քարտուղար Տիգրան Աբրահամյանը ֆեյսբուքյան իր էջում գրել էր. «2022 թվականի սեպտեմբերի 21-ին, «Եռաբլուրում», ոստիկանության կողմից բռնության ենթարկված զոհված հերոսների ծնողների գործը կարճվել է: Նրանց մեծ մասը «Որդիների կանչ» ՀԿ անդամներ են:
Փաստացի, նահատակների ծնողներին քաշքշած, վնասվածքներ հասցրած օպերացիայի պատասխանատուներն ու իրագործողները մնացին անպատիժ»:
