Հայաստանում խորհրդարանի ընտրության վերջնական պաշտոնական արդյունքի հրապարակման օրը՝ այսինքն քվեարկությունից մեկ շաբաթ անց, Հայաստանում է Իլհամ Ալիեւի օգնական, Ադրբեջանի դե ֆակտո ԱԳ նախարար Հաջիեւը: Այդ մասին հաղորդագրություն ու լուսանկար տարածել է Հայաստանի ԱԽ քարտուղարի գրասենյակը:
Հաջիեւը Դիլիջանում հանդիպում է ունեցել ԱԽ քարտուղար Գրիգորյանի հետ: Հաջիեւի «գիծը» Հայաստանում Գրիգորյանն է: Ըստ հաղորդագրության` քննարկել են, այսպես ասած, խաղաղության գործընթացի շարունակության եւ «քաղհասարակությունների միջեւ վստահության» մեխանիզմի առաջմղման հարցեր:
Հասկացաք, որ խոսքը, այսպես ասած, ոչ կառավարական խմբերի շփումների մասին է, որոնք, ինչպես առիթ եմ ունեցել գնահատելու, այլ բան չեն, քան Ադրբեջանի փափուկ ուժի մեխանիզմ:
Խոշոր հաշվով, խորհրդարանի ընտրության քվեարկությունից մեկ շաբաթ անց, Հիքմեթ Հաջիեւը թերեւս Հայաստան է ժամանել այն ճանապարհային քարտեզը քննարկելու, որով նախատեսվում է վճարել այն քաղաքական գինը, ինչի դիմաց պաշտոնական Բաքուն այս ընթացքում դրսեւորել է Երեւանի նախընտրական քարոզչությանը նպաստող վարքագիծ:
Հակոբ Բադալյան, քաղաքական վերլուծաբան
