ՀՀ Ընտրական օրենսգրքում փոփոխություններ և լրացումներ կատարելու թեմայով խորհրդարանական լսումների ժամանակ այսօր հասարակական-քաղաքական գործիչ Էդգար Ղազարյանը կասկածի տակ դրեց արդարադատության փոխնախարար Արմենուհի Հարությունյանի իրավական գիտելիքները։
«Նախարարության կայքում Ձեր կենսագրության մեջ նշել եք, որ փոխնախարարի պաշտոնը ստանձնել եք վարչապետի հրամանագրով։ Բայց վարչապետը հրամանագրեր չի ընդունում, ընդունում է միայն որոշումներ ու կարգադրություններ, և Դուք նշանակվել եք վարչապետի որոշմամբ։ Ա՞յդ իրավական գիտելիքներով եք համակարգում իրավական, օրենսդրական պրոցեսը»,- հարց ուղղեց Ղազարյանը։
ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը դիտողություն արեց վերջինիս՝ նշելով, որ հավաքվել են՝ քննարկելու ՀՀ Ընտրական օրենսգրքում փոփոխություններ և լրացումներ կատարելու մասին նախագիծը։
Էդգար Ղազարյանը նաև շեշտեց՝ ըստ գործող կարգի՝ սահմանված է, որ լսումներին ներկայանար Արդարադատության նախարարը, ոչ թե նրա տեղակալը։
«Հիմա նրա բացակայությունն այստեղ արհամարհանք է վարչապետի՞ նկատմամբ, թե ԱԺ-ի։ Երկրորդ, ուզում եմ իմանալ՝ որևէ քաղաքական կուսակցության կամ դաշինքի հետ այս օրենսդրական նախաձեռնությունը կառավարությունը քննարկել է, թե ոչ։
Հաջորդը՝ կարո՞ղ եք ասել, թե ձեր ՔՊ խմբավորումը հաջորդ ընտրություններին մասնակցելո՞ւ է, թե ոչ։ Այս օրենսդրական նախաձեռնությունը դուք անում եք ձեր քաղաքական թիմի, նրա նպաստավոր ընտրական դիրք ապահովելու համա՞ր, թե հանրային շահերից ելնելով»,- հարց հնչեցրեց Ղզաարյանը։
Արդարադատության փոխնախարար Արմենուհի Հարությունյանն այս հարցն անպատասխան թողեց, միայն նշեց, որ Արդարադատության նախարարության կայքում ինֆորմացիա ինքը չի տեղադրում, սակայն եթե իր կենսագրության մեջ սխալներ կան, համապատասխան անձանց կհորդորի տեքստում ուղղումներ մտցնել։
