Ռուսաստանի հայերի միությունը կոչ է անում Հայաստանի Հանրապետության ղեկավարությունը վերանայել իր որոշումը ՌԴ Պետդումայի պատգամավոր Կոնստանտին Զատուլինին երկիր մուտք թույլ չտալու մասին։ Այս մասին ասվում է ՌՀՄ տարածած հայտարարությունում։
«ՌՀՄ ղեկավարությունը Հայաստանի իշխանությունների հայտարարությունը՝ համարել Զատուլինին «ոչ ցանկալի անձ» Հայաստանի Հանրապետությունում, գնահատում է իբրև քայլ, որն ուղղված է ընդդեմ հայ ժողովրդի, որի պատմության մեջ ընդմիշտ ոսկյա տառերով գրված է Զատուլինի անունն իբրև արդարության խորհրդանիշ, Հայաստանի և Արցախի շահերի պաշտպան և 1995 թ-ին ՌԴ Պետդումայի կողմից Հայոց ցեղասպանության ճանաչման ու դատապարտման բանաձևի հեղինակ», – ասված է հայտարարությունում։
Հիշեցնենք, որ ՌԴ Պետդումայի պատգամավոր, հայ-ռուսական «Լազարևյան ակումբի» հիմնադիր ու ղեկավար Կոնստանտին Զատուլինը ՀՀ ԱԺ-ի կողմից երեքշաբթի օրը նամակ էր ստացել, ըստ որի իր մուտքը մեր երկիր համարվում է անցանկալի։ Բացատրությունում նշված է, թե իբր Զատուլինն իր վերջին հայտարարություններում թույլ է տվել ձևակերպումներ, որոնք վնասում են հայ-ռուսական հարաբերություններին։
