Արդեն որերորդ օրն է՝ «Ուժեղ Հայաստան» կուսակցության գրասենյակները տեղափոխվել են քննչական կոմիտեներ ու դատարաններ, Հակակոռուպցիոն կոմիտեի դիմաց լրագրողների հետ զրույցում ասաց «Ուժեղ Հայաստան» կուսակցության անդամ Էդգար Ղազարյանը՝ հավելելով, որ վերջին օրերի գործերում իրավական հիմք գոյություն չունի։
««Ուժեղ Հայաստան» կուսակցությունն այս պահի դրությամբ ԿԸՀ հայտ չի ներկայացրել։ Եթե ընտրական սուբյեկտ չկա, ինչպե՞ս է հնարավոր այդ ընտրական սուբյեկտի օգտին իրականացնել ընտրողի խրախուսում։
Սովետի ժամանակ մի այսպիսի բան կար. ասում էին՝ հնգամյա պլանը՝ չորս տարում, այսինքն՝ պլանը շուտ կատարեն։ Հիմա այս մարդկանց վրա երևի պլան է դրած, որ իրենք պիտի մարդկանց ձերբակալեն, բայց չեն սպասում մայիսի 2-ին ԿԸՀ-ն կուսակցություններին գրանցի, նոր սկսեն ձերբակալել։ Առաջ են ընկել, մտածում են՝ չեն հասցնի։ Դրա համար գրասենյակների բաշխումն արել են. Վայքը մինչև այսինչ օրը կբռնենք, Արտաշատը՝ այսինչ օրը։ Երևի գրաֆիկ ունեն։
Բայց պարզ է, որ սրանք ակնհայտ քաղաքական հետապնդումներ են։ Այստեղ իրավական բաղադրիչ գոյություն չունի»,- ասաց Ղազարյանը։
Նա նշեց՝ չգիտի, թե որն է իշխանության վերջնական նպատակը, բայց այս պահի դրությամբ այս գործողությունները, որոնք արվում են՝ քաղաքական հետապնդում է` խոչընդոտելու կուսակցության գրասենյակների ամենօրյա բնականոն գործունեությունը։
