Երևանի քաղաքապետարանում տեղի ունեցած որոշ ձերբակալությունների հետ համակարծիք ենք, որոշները մեզ համար խնդրահարույց են, լրագրողների հետ այսօր տեղի ունեցած հանդիպման ժամանակ նշեց Երևանի քաղաքապետի խոսնակ Հայկ Կոստանյանը:
«Տարեսկզբին ձերբակալվեցին, ապա կալանավորվեցին քաղաքապետարանի հասարակական կարգի ծառայության պետը և կոմունալ տնտեսության վարչության պետը։ Մի դեպքում մարդը կալանավորվել է ինչ-որ մի միջնորդություն իրականացնելու համար, մյուս պաշտոնյան ձերբակալվում է նման միջնորդությունը մերժելու համար:
Այս տեսանկյունից մեզ համար կան խնդրահարույց իրավիճակներ. մասնավորապես, կարող եմ շեշտել Արաբկիր վարչական շրջանի ղեկավար Արամ Ազատյանի կալանավորման փաստը: Մարդը փաստացի մեկ տարի կալանավորված է: Նրա փաստաբաններն ուղարկել են գործը ՄԻԵԴ: Այսինքն Երևանի քաղաքապետարանն իր բոլոր աշխատակիցների ենթադրյալ մեղքերի մեջ որոշակի խնդիրներ է տեսնում»,- ասաց նա:
Հայկ Կոստանյանը միաժամանակ նշեց, որ վերջին երկու աշխատակիցների ձերբակալման մասով որևիցե խնդիր չեն տեսնում։
«Խնդիր չենք տեսնում վերջերս ձերբակալված նախկին քաղաքաշինության և հողի վերահսկողության վարչության աշխատակիցների ձերբակալության համար, որովհետև այդ մասով էլ, առաջին հայացքից, Երևանի քաղաքապետարանի կողմից որևէ խնդրահարույց բան չկա։ Իհարկե, անմեղության կանխավարկածը չենք մոռանում: Վերջերս ձերբակալվեցին Շենգավիթ վարչական շրջանի նախկին աշխատակիցներ. այս գործերի, դեպքերի մասով համակարծիք ենք, որոշ դեպքեր էլ, արդեն նշեցի, խնդրահարույց են մեզ համար»,- ասաց նա:
