Ես այստեղ եմ, որպեսզի մեր ամբողջական սատարումը ցուցաբերեմ Հայաստանի կառավարությունը եւ նրա աշխատանքին երիտասարդության ոլորտում. այսօր Գեղարքունիքի մարզկենտրոն Գավառում «Գավառը՝ ՀՀ 2024 թ. երիտասարդական մայրաքաղաք» ծրագրի բացման պաշտոնական արարողության ժամանակ նշել է ՀՀ-ում ԵՄ պատվիրակության ղեկավար Վասիլիս Մարագոսը:
«Մենք ողջունում ենք այս գաղափարը, այն ամեն տարի ունենալու է իր երիտասարդական մայրաքաղաքը: Ես ուզում եմ շնորհավորել Գավառի բոլոր բնակիչներին, մասնավորապես երիտասարդներին այն առիթով, որ Գավառն ընտրվել է որպես երիտասարդական մայրաքաղաք: Մենք սերտորեն աշխատում ենք ինչպես ԿԳՄՍ նախարարության հետ, այնպես էլ ՀԿ-ների եւ երիտասարդական ՀԿ-ների հետ: Մենք ունենք մի շարք նախաձեռնություններ, մենք խրախուսում ենք երիտասարդական ակտիվիստներին, որպեսզի նրանք ստեղծեն երիտասարդական կենտրոններ: Ես շատ ուրախ էի հանդիպել համալսարանական ներկայացուցիչներին, որոնք մասնակցել եմ ԵՄ Էրազմուս ծրագրին: Ես երջանիկ եմ տեղեկացնել ձեզ, որ համագործակցելով նախարարության հետ՝ մենք արդեն իսկ ներգրավել ենք 60 մլն եվրո Հայաստանի կրթական ոլորտը զարգացնելու նպատակով:
Երիտասարդությունը Հայաստանի ապագան է, եւ ճանաչելով երիտասարդության մասնակցության կարեւորությունը Հայաստանի կյանքում՝ մենք վերահաստատում ենք մեր նվիրվածությունը շարունակել մեր աշխատանքը երիտասարդության ոլորտում:
Համագործակցելով նախարարության հետ մենք պատրաստվում ենք ստեղծել երիտասարդական մի հարթակ, որը կօժանդակի իրականացնելու համագործակցության պայմանագիրը Հայաստանի եւ ԵՄ-ի միջեւ: Դրա շրջանակում մենք հիմա աշխատում ենք, որպեսզի ուժեղացնենք Հայաստանի բարեփոխումները, ժողովրդավարությունը եւ տնտեսությունը»,-ասել է ԵՄ դեսպանը:
Նա հավելել է, որ պատրաստ է տարվա ընթացքում էլի մի քանի անգամ այցելել Գավառ՝ քննարկելու երիտասարդության հետ անցկացվելիք հնարավոր միջոցառումները:
