Եվրախորհրդարանն այսօր ընդունած բանաձեւով պահանջել է ադրբեջանական զորքերը դուրս բերել Հայաստանի տարածքից։
Փաստաթղթում նշվում է, որ Եվրախորհրդարանը «հաստատում է իր դատապարտումը Հայաստանի միջազգայնորեն ճանաչված տարածք ադրբեջանական ռազմական ներխուժման և դրա որոշ մասերի շարունակվող օկուպացման վերաբերյալ և վերահաստատում է ադրբեջանական զորքերի դուրսբերման իր պահանջը Հայաստանի ողջ ինքնիշխան տարածքից»։
Բանաձևը նաև «լուրջ մտահոգություն» է հայտնում Ադրբեջանի նախագահի և Ադրբեջանի այլ պաշտոնյաների բորբոքված հայտարարությունների առնչությամբ, որոնք սպառնում են Հայաստանի տարածքային ամբողջականությանը և ինքնիշխանությանը, այդ թվում՝ «Ադրբեջանը Նախիջևանի էքսկլավին կապող արտատարածքային միջանցքի պահանջը»։
Եվրախորհրդարանը նախազգուշացնում է Ադրբեջանին «Հայաստանի դեմ ցանկացած հնարավոր ռազմական արկածախնդրությունից» և ընդգծում է, որ «Նախիջևանի էքսկլավի հետ Ադրբեջանի կապի հետ կապված խնդիրները պետք է լուծվեն Հայաստանի ինքնիշխանության և տարածքային ամբողջականության նկատմամբ լիակատար հարգանքով»։
