ԱԺ նախագահ Ալեն Սիմոնյանը համամիտ չէ ընդդիմության այն պնդումների հետ, թե Ադրբեջանի հետ հարաբերություններում Հայաստանը գնում է միակողմանի զիջումների։
«Առաջին հերթին, ընդիմությունը այդ տեքստը տեսե՞լ է, որ այդպիսի բան է ասում: Երկրորդը, ո՞նց կարող է միակողմանի լինել եթե բոլոր դրույթները վերաբերում է երկու կողմին: Դրա տրամաբանությունը թող իրենցից որևիցե մեկը բացատրի, մենք էլ քննարկենք, հասկանանք, թե ինչն է դրա միակողմանի զիջում:
Դա աբսուրդ է ու անլուրջ է։ Այդ բոլոր մարդիկ, ովքեր նման հայտարարություններ են անում, թող գան, իմ դեմը կանգնեն, կամ ամբիոնից ելույթ ունենան, փորձեն այդ իրենց ասածը որևիցե ձևով հիմնավորեն»,-ԱԺ-ում լրագրողների հետ զրույցում ասաց նա:
Դիտարկմանը, որ իշխանությունները կապիտուլյացիայի են գնում, ԱԺ նախագահը նկատեց՝ առաջին ամենահայտնի կապիտուլյացիան Սերժ Սարգսյանի կապիտուլյացիան էր 2018 թվականին հայ ժողովրդի առաջ։
«Երկրորդը, երբ դու ասում ես՝ իշխանության ոճը հայտնի է, և դրանով ես հիմնավորում ասելիքդ՝ առանց տեքստի հետ ծանոթանալու, դա անլուրջ տպավորություն է տալիս, դա քաղաքական գործչին վայել գործելաոճ չէ:
Բազմիցս հայտարարվել, որ բոլոր կետերը վերաբերում են երկու կողմերին։ Եթե օրինակ, այնտեղ գրված է, որ հայկական կողմը պետք է կապիտուլացվի, դա նշանակում է, որ ադրբեջանական կողմը նույնպես պետք է կապիտուլացվի։ Ասենք, մարդ, ինչքա՞ն կարելի է նույն անիմաստ խոսակցությունը կրկնել»:
Անդրադառնալով այն հանգամանքին, որ Ադրբեջանը պարբերաբար խախտումներ է անում բանակցային գործընթացում, իսկ Հայաստանը սրբորեն կատարում է իր խոստացածը, Ալեն Սիմոնյանն ասաց.
«Հիմա եթե դիմացինը պայմանականորեն վատ բան է անում, դա նշանակում է մենք էլ վատը անե՞նք: Մենք մեր վարկը ունենք, մեր դիրքը ունենք: Տեսեք՝ ինչքան լրատվամիջոց կա Հայաստանի Հանրապետությունում, ինչքան ազատ են լրատվամիջոցները: Հիմա ինչ-որ երկրներում դա ազատ չի, օրինակ Ադրբեջանում, ըստ ԵՄ չափանիշների՝ խոսքի ազատությունը այդ աստիճանի չէ: Հիմա մենք էլ սկսենք իրենց հետ համեմատվե՞լ»:
ԱԺ նախագահը միաժամանակ շեշտեց՝ ժողովրդավար լինելով՝ Հայաստանն անվտանգություն է շահում։
«Այն, որ եվրոդիտորդները գալիս են և սահմանին անցկացնում են հսկողություն, այն, որ միջազգային զեկույցներ ենք ունենում, այն, որ ՀՀ-ին օգնություն է տրամադրվում, այն, որ ՀՀ-ի հետ համագործակցություն է տեղի ունենում, բա այդ ամեն ինչը դրա հաշվին է տեղի ունենում: Կարո՞ղ է մեր դուդուկի կամ մեր սիրուն հայի աչերի համար է այդ ամեն ինչը տեղի ունենում: Հետո էլ բողոքում եք, ասում եք մեր վրա հարձակվեցին, աշխարհը ձայն չհանեց: Բա սխալ ենք մեզ պահել ինչ-որ հարցերում, պատմության ընթացքում, հիմա ճիշտ ենք մեզ պահում: Եվրոպական ընտանիքի, մարդու իրավունքների արժեքների, խոսքի ազատության արժեքների տրամաբանության մեջ ենք պահում։ Դրանից էլ եք բողոքո՞ւմ»,- հարց ուղղեց Սիմոնյանը:
