ԵԱՏՄ-ից դուրս գալը Հայաստանի օրակարգում չկա։ Այս մասին ասել է խորհրդարանի փոխխոսնակ, Թուրքիայի հետ հարաբերությունների կարգավորման գծով Հայաստանի հատուկ ներկայացուցիչ Ռուբեն Ռուբինյանը՝ պատասխանելով հարցին, թե արդյոք Երևանը ակնկալում է դուրս գալ ԵԱՏՄ-ից, որպեսզի կազմակերպությանն անդամակցությունը չխանգարի երկրի ինտեգրմանը ԵՄ, մասնավորապես, մաքսային ընթացակարգերի հարցում:
«Ոչ, նման հարց օրակարգում չկա»,- ասաց Ռուբինյանը։
Հարավային Կովկասում և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարն ասել է, որ ԵՄ-ն հարգում է Եվրասիական տնտեսական միությանը միանալու՝ Հայաստանի որոշումը. «Ուզում եմ հստակություն մտցնել՝ ԵՄ-ի տեսանկյունից մենք բացարձակապես հարգում ենք Հայաստանի, ինչպես նաև մեր բոլոր գործընկերների որոշումները այն քաղաքական միավորումների վերաբերյալ, որոնց նրանք ցանկանում են կամ չեն ցանկանում մասնակցել։ Հայաստանը որոշել է միանալ Եվրասիական միությանը, և մենք գտել ենք հարաբերություններ կառուցելու ճանապարհը՝ հաշվի առնելով դա։ Այստեղ մենք տեսնում ենք մեր հարաբերությունները ներկայիս համատեքստում զարգացնելու ներուժ»։
