«Պատիվ ունեմ» խմբակցության պատգամավորները վերահաստատում են, որ այս պահին իշխանափոխության հասնելու ամենահավանական եղանակը վարչապետին անվստահություն հայտնելու գործընթացն է։ Միաժամանակ հայտարարում ենք, որ այս պահին վարչապետի թեկնածու չունենք և մեր պատրաստակամությունն ենք հայտնում առանց որևէ նախապայմանի քննարկել թեկնածուի հարցը և նախաձեռնել վարչապետի անվստահության գործընթաց, այսօր լրագրողների հետ ճեպազրույցում ասաց «Պատիվ ունեմ» խմբակցության ղեկավար Հայկ Մամիջանյանը։
«Մենք պատրաստ ենք քննարկել և ստորագրել իմպիչմենտի գործընթացը։ Քանի որ ՀՀԿ-ն բազմիցս հայտարարել է, որ այս գործընթացը մեզ համար իշխանափոխության ամենահավանական տարբերակն է, դրա համար մենք պատրաստ ենք նմանօրինակ քննարկումների ցանկացած շահագրգիռ կողմի հետ»,- ասաց նա։
«Հանրապետականը բազմիցս հայտարարել է, որ այս գործընթացը մեր համար իշխանափոխության ամենահավանական տարբերակն է, իսկ մենք հայտարարել ենք, որ մեր առաջնահերթությունն է իշխանափոխությունը, այլ ոչ թե իշխանության հասնելը, դրա համար ավելի պարզ, ավելի հեշտ այս գործընթացը իրականացնելու համար, մենք պատրաստ ենք նմանօրինակ քննարկումների ցանկացած շահագրգիռ կողմի հետ»,-ասաց նա:
Մամիջանյանը հիշեցրեց, որ ապրիլի 24-ին Սերժ Սարգսյանը հայտարարել էր՝ՀՀԿ-ն ունի ծրագիր, այդ թվում՝ փողոցային պայքարի, սակայն դրա մասին հավելյալ որևէ տեղեկություն այս պահին չի կարող տալ՝ գործընթացի շահերից ելնելով:
Հարցին՝ փորձելո՞ւ են Նիկոլ Փաշինյանին մերժել այնպես, ինչպես յոթ տարի առաջ Սերժ Սարգսյանին և ՀՀԿ-ին էին մերժում, պատգամավորը պատասխանեց.
«Այդպես չենք անելու, որովհետև այդ ժամանակ ակնհայտ առկա էին արտաքին ուժեր, որոնք հիմնական շահառուն էին այս գործընթացի և ՀՀ քաղաքացիների ճնշող մեծամասնությունը խաբված էր այդ ժամանակ: Սա մեկ պատճառ, որը տարբերակելու է այդ գործընթացը մեր գործընթացից, որովհետև մեր գործընթացի շահառուն նախաձեռնողը և իրականացնողը ՀՀ քաղաքացին է լինելու: Երկրորդ, վերջնարդյունքի տեսանկյունից, մենք կյանքում չենք կարող ներգրավված լինել մի գործընթացում, որը բերեց այն արդյունքներին, որոնց բերեցին ձեր նշած իրադարձությունները»:
Դիտարկմանը, որ «Հայաստան» խմբակցությունը հայտարարել է, որ եթե բերեն ՔՊ-ական 8 պատգամավորի ստորագրություն, որոնք պատրաստ են միանալ իմպիչմենտին, ապա իրենք 28 պատգամավորով կմիանան դրան, Մամիջանյանն ասաց. «Ես չեմ համարում, որ հայրենիքի համար պայքարի պարագայում դու պիտի նստես ու հաշվես, թե հաջողության հասնելու հավանականությունը ինչքան է։ Մեր բոլորի տրամաբանությունը հետևյալն է. բոլոր գործոնները, բոլոր գործողությունները հասցնել իրենց արդյունավետության մաքսիմումին ու կպնել գործի»:
