Երևանի պետական համալսարանի պատմության ֆակուլտետի մեծ դահլիճում սեպտեմբերի 2-ին տեղի ունեցավ Արցախի երիտասարդ գիտնականների և մասնագետների միավորման (ԱԵԳՄՄ) «ԳԻՏԱԿԱՆ ԱՐՑԱԽ» պարբերականի 2022 թ. 2-րդ (13-րդ) համարի շնորհանդես-քննարկումը:
Արդեն ձևավորված ավանդույթի համաձայն՝ նոր համարի քննարկումը կազմակերպվել էր Հայաստանի Մայր բուհում՝ որպես պարբերականի հիմնադիր, որին մասնակցել են խմբագրական խորհրդի անդամները և հոդվածագիրները:
«ԳԻՏԱԿԱՆ ԱՐՑԱԽ» պարբերականի գլխավոր խմբագիր, ի.գ.թ., դոցենտ Ավետիք Հարությունյանը շնորհանդես-քննարկման ժամանակ նշել է, որ պարբերականի նոր համարի միջոցառումը կազմակերպվել է՝ ի նշանավորումն Արցախի Հանրապետության անկախության հռչակման 31-ամյակի:
Նախքան միջոցառման մեկնարկը ներկաները մեկ րոպե լռությամբ հարգեցին հայոց պետականության համար իրենց կյանքը զոհաբերած հայորդիների և Պարբերականի խմբագրական խորհրդի նախագահ Արամ Հրաչիկի Սիմոնյանի անմար հիշատակը:
Շնորհանդես-քննարկման ժամանակ ելույթ են ունեցել խմբագրական խորհրդի անդամներ Հայկ Սարգսյանը և Էդիկ Մինասյանը, հոդվածագիրներից՝ պրոֆեսոր Գևորգ Ստեփանյանը, արվեստագիտության թեկնածու Մարիաննա Տիգրանյանը, տ.գ.թ., դոցենտ Աննա Հակոբջանյանը, տ.գ.թ., դոցենտ Նարինե Միրզոյանը, պ.գ.թ., դոցենտ Միքայել Մալխասյանը և այլոք, ովքեր իրենց խոսքում կարևորեցին պարբերականի դերը որպես գիտական հրապարակումների հարթակում Հայաստանի և Արցախի միջև յուրօրինակ կամրջի, սահմանված միջազգային գիտական չափանիշներին իրականում համապատասխանող բազմաբովանդակ, արդիական և հետաքրքիր, նաև օտարերկրյա հեղինակների հրապարակումներով աչքի ընկնող, միջազգային ասպարեզում արդեն մեծ ճանաչման արժանացած, Արցախյան ներկայիս մարտահրավերների վերլուծությանն առանձնակի տեղ հատկացնող և դրանց գիտական լուծման ուղիներ առաջարկող պարբերականի: Նրանք միաժամանակ ընդգծեցին գլխավոր խմբագիր Ավետիք Հարությունյանի արգասաբեր աշխատանքը, հետևողական ջանքերը և անմնացորդ նվիրումը որպես պարբերականի գլխավոր խմբագրի:
Պարբերականի նոր համարում հրապարակվել է նաև իրավագիտության դոկտոր, պրոֆեսոր Արթուր Ղամբարյանի «Հայոց պետականության պահպանման սահմանադրաիրավական ուղիները» գրքի վերաբերյալ երկու գրախոսություն, որոնք հեղինակել են «Սահմանադրական մշակույթ» միջազգային գիտավերլուծական կենտրոնի խորհրդի նախագահ, իրավագիտության դոկտոր, պրոֆեսոր Գագիկ Հարությունյանը և Հայ-ռուսական համալսարանի իրավունքի տեսության և սահմանադրական իրավունքի ամբիոնի ավագ դասախոս, ՀՀ վարչական դատարանի դատավոր, իրավաբանական գիտությունների թեկնածու, դոցենտ Ռաֆիկ Խանդանյանը:
Քննարկումն առանձնահատուկ էր նաև նրանով, որ այն նվիրված էր հայագիտության մեծ երախտավորի՝ Արամ Սիմոնյանի հիշատակին: Մերի Հովհաննիսյանն իր ելույթում ներկայացրեց մահախոսականը, որը հստակ բնութագրում էր Արամ Սիմոնյանին որպես ականավոր գիտնականի, հրաշալի ղեկավարի և անձնավորության, նրա մեծ ավանդը պարբերականի հաջողություններում:
Քննարկմանը ելույթ ունեցան նաև մի շարք հոդվածագիրներ, ովքեր իրենց շնորհավորանքի խոսքն ուղղեցին պարբերականի նոր համարի լույսընծայման, նոր ուսումնական տարվա մեկնարկի և Արցախի Հանրապետության անկախության հռչակման 31-ամյակի առթիվ, շնորհակալություն հայտնեցին պարբերականում հրապարակումներով հանդես գալու հնարավորության ընձեռնման համար և միաժամանակ ցանկացան հետագա համարներում հանդես գալ նորանոր հրապարակումներով:
Նշենք, որ «ԳԻՏԱԿԱՆ ԱՐՑԱԽ» պարբերականի 13-րդ համարում լույս է տեսել 30 հեղինակի 22 հոդված, գրքի 2 գրախոսություն և 1 մահախոսական: Հեղինակները ներկայացնում են Արցախը, Հայաստանը, Ռուսաստանը, ԱՄՆ-ն և Իսրայելը: Հեղինակներից 5-ը գիտությունների դոկտոր է, 8-ը՝ գիտությունների թեկնածու, 14-ը՝ ասպիրանտ, իսկ 3-ը՝ երիտասարդ հետազոտող:
Հիշեցնենք, որ ընթացիկ համարի տպագրությանն աջակցել է «Hi-Am» բարեգործական հիմնադրամը՝ ի դեմս տնօրեն Նշան Աճեմյանի:
«Գիտական Արցախ» պարբերականը ՀՀ ԲՈԿ-ի նախագահի 2022թ. փետրվարի 1-ի թիվ 09Ա հրամանով ընդգրկվել է Ատենախոսությունների հիմնական արդյունքների և դրույթների հրատարակման համար ՀՀ բարձրագույն որակավորման կոմիտեի կողմից 2022 թվականին ընդունելի գիտական հրատարակությունների ցուցակում։ «Գիտական Արցախ»-ը տպագրվում է Web of Science և Scopus գիտատեղեկատվական շտեմարաններում ընդգրկված գիտական պարբերականներին առաջադրվող պահանջներին համապատասխան:
Լուսինե Ծպնեցյան
