Լիբանանի նախագահ Ջոզեֆ Աունը, Վաշինգտոնում իսրայելցի և լիբանանցի պաշտոնյաների միջև ուղիղ բանակցությունների ֆոնին, հայտարարել է, որ իր երկրի գլխավոր նպատակը իսրայելական ուժերի դուրսբերումն է հարավային Լիբանանից։
Հայտարարությունը X-ի էջում հրապարակել է նախագահական գրասենյակը։
Աունը շեշտել է, որ վերջին օրերի իրադարձությունները հաստատել են, որ բանակցություններ վարելը ճիշտ է. «Վերջին օրերի զարգացումները ապացուցեցին, որ բանակցությունների օգտին մեր կողմնորոշումը ճիշտ էր։ Սա աշխարհում միակ ուղին է, որը վստահելի է ազգային նպատակներին հասնելու և բոլոր իրավունքները վերականգնելու համար»։
Լիբանանի առաջնորդը հույս է հայտնել, որ այս բանակցությունները վճռորոշ կլինեն իր երկրի նպատակներին հասնելու առումով. «Մենք հույս ունենք, որ այս բանակցությունները վճռորոշ արդյունքներ կտան Լիբանանի լիակատար ինքնիշխանությունը վերականգնելու և նրա տարածքում պետական իշխանությունն ապահովելու ուղղությամբ»։
Աունը նշել է, որ Բեյրութը չի նահանջի հարավային Լիբանանից Իսրայելի դուրս գալու պահանջից. «Այսօր մենք հայտարարում ենք, որ չենք ընդունի ավելի պակաս պայման, քան հարավային Լիբանանում Իսրայելի օկուպացիայի դադարեցումը և արտաքին ազդեցության բոլոր մեխանիզմների վերացումը: Մեր միակ ընտրությունը մեր ազգային ինքնիշխանությունն է»:
