Կարմիր խաչի միջազգային կոմիտեի (ԿԽՄԿ) պատվիրակությունը Ադրբեջանի իշխանությունների պահանջով սեպտեմբերի 3-ին կփակի իր գրասենյակը Բաքվում։ Այս մասին լրագրողների հետ ճեպազրույցում ասաց Հայաստանում ԿԽՄԿ պատվիրակության ղեկավար Դաֆնե Մարեն։
«Այո, իսկապես գրասենյակը փակվելու է սեպտեմբերի 3–ին, սակայն դա չի նշանակում, որ մեր շփումը Ադրբեջանի իշխանությունների հետ կդադարի։ Մենք շարունակելու ենք փորձեր անել անդրադարձ ունենալու և առաջարկել մեր չեզոք միջնորդի դերը մի շարք հարցերում։ Այստեղ ամենակարեւոր հարցերից մեկը անհետ կորածների խնդիրն է։ Սա հաշվի առնելով, մենք հույս ունենք, որ առաջիկայում կունենանք հնարավորություններ՝ ընդգրկվելու որպես չեզոք միջնորդ։ Այս հարցի շուրջ Ադրբեջանի հետ քննարկումները շարունակվում են նույնիսկ այն պարագայում, որ գրասենյակը ֆիզիկապես գոյություն չի ունենալու»,–ասաց նա։
Դաֆնե Մարեի խոսքով՝ վերջին տարիների և տասնամյակների ընթացքում կատարված աշխատանքը չի մոռացվի։
«Դուք տեսել եք, որ խաղաղության պայմանագրում նշված է, որ կլինի որոշակի մեխանիզմ, որը կգործի միջազգային կազմակերպությունների ներգրավվածությամբ՝ անհայտ կորածների ճակատագրերի պարզաբանման ուղղությամբ։ Եվ այս հարցում մենք տեսնում ենք հնարավորություն մեր դերը որոշարկելու և հետագա աշխատանքներում որոշակի աջակցություն ցուցաբերելու առումով»,–ասաց նա։
Ճշտող հարցին՝ կա՞ որեւէ հնարավորություն, որ գերիներին այցերը կշարունակվեն, նա պատասխանեց. «Մենք դեռևս շարունակում ենք քննարկումները Ադրբեջանի իշխանությունների հետ տվյալ հարցի շուրջ։ Սա քննարկել ենք հնարավոր այն տարբերակները, որոնք հնարավոր է գործարկել, որ մուտք ունենանք պահվող անձանց մոտ, բայց չենք ունեցել հաջողություն։ Այս պահին մենք չենք կարողանում շարունակել մեր աշխատանքն այս ուղղությամբ։ Մենք անընդհատ վերադառնալու ենք այս հարցին, մեր փորձերը շարունակվելու են»։
