Բացել «Զանգեզուրի միջանցքը», վերադարձնել անկլավները, խաղաղության պայմանագիր ստորագրել միայն Ադրբեջանի ներկայացրած պայմաններով

«Հայաստանը պետք է բացի Զանգեզուրի միջանցքը։ Ադրբեջանից Ադրբեջան մարդիկ և բեռները պետք է անցնեն առանց ստուգումների։ Եթե ​​իմ նշած երթուղին չբացվի, ուրեմն մենք մտադիր չենք բացել Հայաստանի հետ սահմանը այլ վայրում։ Այսինքն՝ սրանից ավելի շատ վնաս կստանան, քան օգուտ»,- հայտարարել է Ալիևը՝  հավելելով, որ Հայաստանի ղեկավարության երաշխիքները Նախիջևան տանող ճանապարհի անվտանգության վերաբերյալ բավարար չեն, վերահսկողությունը պետք է իրականացնի ռուսական կողմը, ինչպես նշված է պայմանագրում։

Ադրբեջանական մամուլը գրում է, որ  Բաքուն  ամենաբարձր մակարդակով ճանաչում է Հայաստանի տարածքային ամբողջականությունը և ռազմական ուժով չի բացելու Զանգեզուրի միջանցքը։ Եթե Հայաստանը չկատարի իր ստորագրած եռակողմ համաձայնագրի կետը և փակ պահի Զանգեզուրի միջանցքը, ապա Ադրբեջանը փակ կպահի նաև տրանսպորտային զարկերակները, որոնք Հայաստանը կբացի աշխարհի առաջ։ Նկատի ունենալով, որ Ադրբեջանի ռազմավարական գործընկեր Թուրքիան նույնպես ուղղակիորեն կապում է սահմանների բացման գործընթացը ադրբեջանա-հայկական հարաբերությունների կարգավորման հետ, Հայաստանը կշարունակի մնալ մեկուսացված,  հավերժ կմնա փակուղում։

Ալիևը մեկնաբանել է նաև Զանգեզուրի միջանցքի համատեքստում Հայաստանի կողմից առաջադրված «խաղաղության խաչմերուկի» նախագիծը։ Նա  այն անվանել է PR արշավ։ «Իրականում սա ոչ այլ ինչ է, քան PR արշավ։ Նրանք առաջին հերթին մեզ պետք է անարգել անցում ապահովեն Զանգիլանի և Օրդուբադի միջև ընկած տարածքում։ Սա իրենց պարտավորությունն է»։

 Ալիևը պահանջ է ներկայացրել. «4 գյուղերը, որոնք անկլավ չեն, պետք է վերադարձվեն առանց որևէ պայմանի, և 4 գյուղերի հետ կապված առանձին փորձագիտական ​​խումբ ստեղծվի։

Մենք կարծում ենք, որ բոլոր անկլավները պետք է վերադարձվեն։ Անկլավներ տանող ճանապարհներին պետք է պայմաններ ստեղծվեն, մարդիկ պետք է բնակություն հաստատեն անկլավներում»։

Միաժամանակ, պաշտոնական Բաքուն կողմնակից է  առանց սահմանազատման գործընթացի, խաղաղության պայմանագրի ստորագրման։

 «Եթե մենք հետաձգենք խաղաղության պայմանագիրը՝ սպասելով սահմանազատմանը, այն կարող է չստորագրվել նույնիսկ 30 տարի հետո»,- նշել է  Ալիևը։

Ադրբեջանական մամուլում լույս տեսած «վերլուծական հոդվածում» նշվում է. «Եթե ​​Հայաստանի քաղաքական իշխանությունները ճիշտ վերլուծեն  Ալիևի կողմից խաղաղության պայմանագրի ստորագրման պայմանները, ապա խաղաղության պայմանագիր կնքելու և Հարավային Կովկասում խաղաղություն հաստատելու համար մի քանի ամիս կպահանջվի։ Որովհետև խաղաղությունը կարող է ստորագրվել միայն հաղթող կողմի՝ Ադրբեջանի կողմից առաջադրված պայմաններով, և, ինչպես երկրի ղեկավարն է ասել, այդ պայմանները շատ արդար են։

Այս պահին միակ ռացիոնալ քայլը, որ կարող է անել Նիկոլ Փաշինյանի կառավարությունը, Ադրբեջանի ներկայացրած 5 հիմնարար սկզբունքների հիման վրա խաղաղության պայմանագիր ստորագրելն է, Զանգեզուրի միջանցքի բացումը, օկուպացված ադրբեջանական 8 գյուղերի ազատագրումը և սահմանային գործընթացը սկսելը։

Այս քայլերի  և խաղաղության համաձայնագրի ստորագրման ձգձգումը առաջին հերթին վնասում է հենց Հայաստանին։ 

 Իսկ Ադրբեջանը ցանկացած հարցում միշտ պլան Բ ունի»։