Ատելության հրահրման հիմքով քրեական հետապնդման իրականացումն անձի նկատմամբ իմ կողմից դիտարկվել է մտահոգիչ։ Այսինքն՝ խոսքը կարող է լինել կամ ընկալվել որպես ատելության խոսք, բայց քրեաիրավական պատասխանատվություն նման խոսքի համար պետք է կիրառելի լինի բացառիկ դեպքերում։ Լրագրողների հետ ճեպազրույցում այսօր այս մասին ասաց ՄԻՊ Անահիտ Մանասյանը՝ անդրադառնալով 70-ամյա Ղարիբ Բաբայանի կողմից Հանրապետության հրապարակում մի խումբ իրանցիների մասնակցությամբ տեսանյութի հրապարակման համար նախաձեռնված քրեական վարույթին։
«Բայց անկախ նրանից, որ մտահոգիչ եմ համարում նման հիմքով քրեական հետապնդման իրականացումը, նաև որևէ մեկի կողմից չի կարող արդարացվել վիրավորանքի, ատելության խոսքի տարածումը, դրա համար բոլորս պետք է ձեռնպահ լինենք դրանից։
Հետագայում բանավեճը տարածվեց այն ուղղությամբ, որ գուցե անվտանգության հետ կապված հարցեր կան, որոնք քննության ենթակա են։ Ես նշել եմ, որ դա իմ իրավասություններից դուրս է, ես չեմ կարող իրավասու մարմիններին պարտադրել՝ անվտանգության հարցերով իրականացնել քննություն կամ ոչ, մինչև այն պահը, քանի դեռ գործ չունենք մարդու իրավունքների խնդիրների հետ»,-ասաց Անահիտ Մանասյանը։
