Ալիևը փորձում է սա ներկայացնել որպես քրեական գործ՝ պնդելով, թե էթնիկ զտման իրականացումը նորմա է, իսկ դրան դիմադրելը՝ հանցագործություն։ Բայց եկեք հստակեցնենք․ այս մարդիկ մեղավոր են միայն նրանով, որ հավատացել են Արցախի բնիկ բնակչության արժանապատվության, ինքնավարության և ինքնորոշման իրավունքին։
Այս մասին Կապիտոլիումի բլուրում կայացած մամուլի ասուլիսի ընթացքում, որը նվիրված էր Ադրբեջանի կողմից հայ ռազմագերիների ապօրինի պահման հազարերորդ օրվան, հայտարարել է ԱՄՆ կոնգրեսական, Հայկական հարցերով կոնգրեսական խմբի համանախագահ Բրեդ Շերմանը։
Նա հիշեցրել է, որ Բաքվի ռազմական ագրեսիան 2023 թվականին, որը հաջորդեց իննամսյա խիստ շրջափակմանը, հանգեցրել է ամբողջական էթնիկ զտման՝ ավելի քան 100 հազար բնիկ հայերի բռնի տեղահանությանը այն հողերից, որտեղ նրանց նախնիները ապրել են հազարամյակներ շարունակ։ Միաժամանակ ադրբեջանական ուժերն ապօրինաբար գերեվարել են տասնյակ մարդկանց, այդ թվում՝ Լեռնային Ղարաբաղի ժողովրդավարական ճանապարհով ընտրված ղեկավարներին։
Կոնգրեսականը շեշտել է, որ գերիները պարբերաբար ենթարկվում են ծեծի և խոշտանգումների, ինչը փաստագրվել է միջազգային իրավապաշտպան կազմակերպությունների կողմից, իսկ նրանց նկատմամբ դատավարությունները վերածվել են փակ ցուցադրական ֆարսերի՝ ավարտվելով 15 տարվա ազատազրկումից մինչև ցմահ դատապարտմամբ։
«Փետրվարին այսպես կոչված ռազմական դատարանը ցմահ ազատազրկման դատապարտեց Արցախի նախկին ղեկավարներին, այդ թվում՝ նախկին նախագահ Արայիկ Հարությունյանին և նախկին արտգործնախարար Դավիթ Բաբայանին, որը իր առևանգումից ընդամենը մի քանի ամիս առաջ հանդիպել էր ինձ հետ իմ գրասենյակում։ Քիչ անց ավելի քան մեկ տարի մենախցում պահվելուց հետո 20 տարվա ազատազրկման դատապարտեցին նաև նախկին պետնախարար Ռուբեն Վարդանյանին։ Իսկ Amnesty International-ում միանգամայն արդարացիորեն այս դատավճիռը անվանել են արդարադատության ծաղրանկար»,– նշել է Բրեդ Շերմանը։
Քաղաքական գործիչը նշել է, որ Ադրբեջանում, որի ազատության մակարդակը իրավապաշտպանների կողմից գնահատվում է ընդամենը 6 միավոր 100-ից, նույնիսկ սեփական քաղաքացիները չեն կարող հույս դնել արդար դատավարության վրա, էլ չասած հայերի մասին, որոնց դեմ տասնամյակներ շարունակ վարվում է այլատյացության պետական քաղաքականություն։
Շերմանը շեշտել է, որ պատանդ պահելու գործելակերպը Բաքուն կիրառել է նաև 2020 թվականի պատերազմից հետո՝ հայ հասարակությանը ահաբեկելու համար, իսկ համացանցում բազմիցս հայտնվել են հայ զինծառայողների արտադատական մահապատիժների սարսափելի կադրեր, որոնք տարածվել են հենց կատարողների կողմից։
Կոնգրեսականի խոսքով՝ ԱՄՆ վարչակազմը պետք է օգտագործի առկա բոլոր գործիքները՝ Բաքվի վրա ճնշում գործադրելու համար։ Նա հայտնել է, որ պատրաստել և Ներկայացուցիչների պալատի արտաքին հարաբերությունների հանձնաժողովի նախագահի հետ համաձայնեցրել է հատուկ ուղղում, որը Վաշինգտոնից պահանջում է վճռական քայլեր ձեռնարկել պահվող անձանց ազատելու համար։
«ԱՄՆ ներկայիս վարչակազմը ձգտում է տարածաշրջանում խաղաղության հասնել։ Բայց իսկական և տևական խաղաղություն չի լինի, քանի դեռ յուրաքանչյուր հայ գերի և քաղբանտարկյալ չի ազատվել ադրբեջանական բանտերից և հնարավորություն չի ստացել վերադառնալու իր ընտանիքի մոտ»,– եզրափակել է Բրեդ Շերմանը։
