«Մարտի 1-ը բացահայտված է, բայց մեղավորները դեռ պատժված չեն»,- հայտարարեց Նիկոլ Փաշինյանը 2008-ի մարտի 1-ի զոհերին նվիրված հուշարձանի բացման արարողությունից հետո՝ լրագրողների հետ զրույցում:
Այսօր լրանում է մարտիմեկյան արյունալի իրադարձությունների 15-րդ տարին։
«Այն, որ մինչև հիմա «Մարտի 1-ի» մարդասպանները հայտնաբերված չեն, դա չի նշանակում, որ այդպես չի լինի։ Մանավանդ՝ ամենամեծ խնդիրը հետևյալն է, կամ մեծ խնդիրներից մեկը, որ նաև քրեական գործի վարույթներով է հիմնավորվել, ապացուցվել, որ նախաքննությունը 2008 թվականի մարտի 1-ից անմիջապես հետո ոչ միայն ամբողջ ջանքերը չի գործադրել, որպեսզի տեղի ունեցած հանցագործությունը բացահայտվի, այլև բոլոր հնարավոր ջանքերը գործադրվել են, որպեսզի բացահայտումը դժվար լինի կամ անհնար դառնա»,- ասել է վարչապետը։
Նա հավելել է, որ իր դիրքորոշումն այն է, որ լիարժեք և ամբողջական պետք է հասնեն բացահայտմանը։
«Դա մեր օրակարգից դուրս չի եկել։ Մեծ խնդիրներից մեկն այն է, որ նաև քրեական գործի վարույթներով հիմնավորվել, ապացուցվել է, որ 2008-ի մարտի 1-ից անմիջապես հետո նախաքննությունը ոչ միայն ամբողջ ջանքերը չի գործադրել, որպեսզի տեղի ունեցած հանցագործությունը բացահայտվի, այլև բոլոր ջանքերը գործադրվել են, որ բացահայտումը դժվար լինի կամ անհնար դառնա: Ես մի դրվագ հիշեցնեմ, որ այստեղից հավաքված պարկուճները հետագայում քրեական գործի շրջանակներում փոխվել են: Եղած իրական պարկուճները փոխարինվել են այլ պարկուճներով եւ նման այլ բազմաթիվ դեպքեր»։
