Միջազգային կրոնական ազատության հարցերով ԱՄՆ հանձնաժողովը (USCIRF) ԱՄՆ կառավարությանը կոչ է արել Ադրբեջանին թողնել հատուկ հսկողության ցանկում՝ կրոնական ազատության լուրջ խախտումներ կատարելու կամ հանդուրժելու համար։
Հանձնաժողովը միաժամանակ կոչ է արել թիրախային պատժամիջոցներ կիրառել Ադրբեջանի կառավարական մարմինների, մասնավորաես Ներքին գործերի նախարարության կազմակերպված հանցագործության դեմ պայքարի գլխավոր վարչության, և կրոնական ազատության լուրջ խախտումների համար պատասխանատու պաշտոնյաների նկատմամբ՝ սառեցնելով նշված անձանց ակտիվները և/կամ արգելելով նրանց մուտք գործել Միացյալ Նահանգներ։
Հանձնաժողովը միաժամանակ կոչ է արել օժանդակել անկախ միջազգային դիտորդի, մասնավորապես՝ Միավորված Ազգերի Կազմակերպության կողմից Լեռնային Ղարաբաղ և հարակից տարածքներ տեղում այցի կազմակերպմանը՝ մշակութային և կրոնական ժառանգության գույքագրումը ստուգելու և փաստաթղթավորելու համար։
Նշվում է, որ ԱՄՆ Կոնգրեսը պետք է պահանջի Ադրբեջանում կրոնական ազատության ոլորտում կոնկրետ բարելավումներ, նախքան ԱՄՆ նախագահը կարողանա վերացնել երկրին տրամադրվող անվտանգության օգնության սահմանափակումները։
Հանձնաժողովը կոչ է արել լսումներ անցկացնել Սենատում և/կամ Ներկայացուցիչների պալատում՝ Ադրբեջանում կրոնական ազատությանն առնչվող հարցերը լուսաբանելու համար։
Նշվում է, որ ավելի վաղ ամերիկյան Freedom House ոչ կառավարական իրավապաշտպան կազմակերպությունը պարզել էր, որ Ադրբեջանը 2020 և 2023 թվականներին իր ռազմական գործողությունների ընթացքում «Լեռնային Ղարաբաղում հայ բնակչության և պատմամշակութային ներկայության էթնիկ զտման համապարփակ, մեթոդական ռազմավարություն է իրականացրել»։
Կազմակերպությունը հանգել է եզրակացության, որ Ադրբեջանի գործողությունները ռազմական հանցագործություններ են և մարդկության դեմ ուղղված հանցագործություններ։ Հայ ռազմագերիները, ըստ հաղորդումների, ենթարկվել են կրոնական բռնության, ներառյալ՝ բանավոր վիրավորանքների, միաժամանակ Բաքուն յուրացրել և ոչնչացրել է հայկական կրոնական հուշարձանները։
