ԱԺ փոխխոսնակ. ժամը 16:00-ին տեղի կունենա սահմանին տիրող իրավիճակի շուրջ փակ քննարկում
Այսօր ժամը 16:00-ին տեղի կունենա սահմանին տիրող իրավիճակի շուրջ փակ քննարկում: Այս մասին NEWS.am-ի թղթակցի հետ զրույցում ասաց ՀՀ ԱԺ փոխխոսնակ Իշխան Սաղաթելյանը:
Նա նշեց, որ հանդիպմանը ներկա կլինեն նաեւ ՀՀ ԶՈւ ՇԳ ներկայացուցիչները:
«Հնարավոր է, որ քննարկմանը ներկա լինի ԳՇ պետը կամ նրա տեղակալը»,-հավելեց Սաղաթելյանը:
Նշենք, որ համապատասխան առաջարկը երեկ արել էր «Հայաստան» խմբակցության ղեկավար Սեյրան Օհանյանը:
Հիշեցնենք, որ օգոստոսի 16-ին Ադրբեջանի զինված ուժերը կրակ են բացել հայ-ադրբեջանական սահմանի ուղղությամբ: Պատասխան գործողությունների արդյունքում հակառակորդի կրակը ճնշվել է: Ադրբեջանական կողմը կրակ է բացել նաեւ օգոստոսի 17-ին, ինչի հետեւանքով Սոթքում հայ զինծառայող է հրազենային վիրավորում ստացել: Հակառակորդն ունի մեկ զոհ եւ մեկ վիրավոր:
