Ադրբեջանը եւ Հայաստանը կարող են իրավիճակի սրում հրահրել խաղաղության պայմանագրի կնքման նախաշեմին։ Այս մասին ՏԱՍՍ-ին տված հարցազրույցում ասել է «Վալդայ» միջազգային քննարկումների ակումբի զարգացման եւ աջակցության հիմնադրամի խորհրդի նախագահ Անդրեյ Բիստրիցկին։
«Հնարավոր է, որ այժմ այս երկրները բավական լուրջ հայտարարություններ են փոխանակում խաղաղության պայմանագրի կամ ինչ-որ համաձայնագրի նախաշեմին։ Միեւնույն ժամանակ, այս հայտարարություններին հաջորդում են պայմանագրին սկզբունքային պատրաստակամության մասին հայտարարությունները, ուստի միշտ չէ, որ հեշտ է տարբերել քաղաքական հռետորաբանությունը իրական վիճակից»,-ասել է նա։
Բիստրիցկին նշել է, որ նախորդ տարիներին եւս, երբ խոսվում էր քիչ թե շատ հիմնարար համաձայնագրի կնքման մասին, կողմերը սադրիչ հայտարարություններ էին անում միմյանց դեմ՝ իրենց բանակցային դիրքերն ամրապնդելու համար։ «Ես այդքան ուղիղ չէի խոսի Հայաստանի եւ Ադրբեջանի միջեւ նոր հակամարտության հավանականության մասին։ Ռիսկերը միշտ էլ կան, մենք դա տեսել ենք 2020 թվականին, բայց միեւնույն ժամանակ երկու կողմերն էլ հասկանում են, որ ռազմական գործողությունները ծայրահեղ դեպք են»,-ասել է նա։
Ավելի վաղ ամերիկյան Foreign Policy-ի փորձագետները կարծիք են հայտնել, որ Ադրբեջանի եւ Հայաստանի միջեւ հնարավոր նոր պատերազմը կլինի կարճատեւ, բայց ոչ պակաս դրամատիկ, քան 2020 թվականի 44-օրյա հակամարտությունը։
