Ադրբեջանական զինուժը շարունակում է ինտենսիվ ամրաշինական աշխատանքներ իրականացնել Սյունիքի սահմաններին։ Արավուս գյուղից մի քանի հարյուր մետր հեռավորության վրա ադրբեջանական շարժն ակտիվացել է։ Այս մասին «Փաստինֆո»-ին հայտնեց Արավուսի գյուղապետ Արգամ Հովսեփյանը։
«Իրենք ուժեղ ինժեներական աշխատանքներ են անում։ Աշխատանքները մեր մոտից տեսանելի են, մեզանից 300-600 մետր են հեռու։ Մեր դիմացը 13 հատ ադրբեջանական պոստ կա, որտեղ ուժեղ աշխատանքներ են իրականացնում՝ մեծ տրակտորներով, էքսկավատորներով։ Շարժը շատացել է։ Բրիգադն էլ մեր դիմացն է՝ երկու կմ հազիվ հեռու լինի»,- ասել է նա։
Ադրբեջանական կողմը սահմանի երկայնքով հողի շերտ է պատել, որպեսզի գյուղի բնակիչների համար տեսանելի չլինի, թե ինչ են կառուցում։
«Չի երևում, թե ինչ են սարքում։ Էնքան քանդել են, դիմացը հող են լցրել, հետևը ինչ իմանաս՝ ի՞նչ են անում»։
Շինարարության համար ադրբեջանական շարասյունն անցնում է Կուբաթլուով, Բերձորով, ռուսական կողմի ուղեկցությամբ Աղավնոյի ձորով հասնում մինչև Արավուս։
Գեղարքունիքում և Արարատում հուլիսի 20-ից սկսված փոխհրաձգություններից առաջ թշնամին կրակել է նաև Սյունիքի ուղղությամբ: Թշնամին կրակել է հենց Արավուսի՝ հայկական դիրքերի ուղղությամբ:
«Երկուսից մինչև վեցը կրակում էին։ Դեպի վերև էին պահում։ Որ ասեմ մեզ վրա էր՝ չէ։ Մեր պոստերի վրա էր, բայց վերև էին պահել, որ լուսարձակումներ լինեին։ Մեր ուղիղ դիմացն էր»։
Գյուղի սահմանները հսկում է հայկական զինուժը, մարտական հերթափոխ կանցկացնեն նաև ԱՏԱՆ ռազմահայրենասիրական զինավանի կամավորները։
Միևնույն ժամանակ, համայնքապետի փոխանցմամբ, գյուղի բնակչներն ապրում են առօրյա կյանքով։ Գյուղի 64 հա սեփական, պահուստային հողը մնացել է ադրբեջանական կողմի վերահսկողության տակ։ Բնակիչները անասունների 80 տոկոսը վաճառել են, յուրաքանչյուր ընտանիք մաքսիմում երկու խոշոր եղջերավոր կենդանի է պահում՝ ապրելու համար։
Հիմա, որպեսզի մնացած հողերը մշակեն, կառավարության աջակցության կարիքն ունեն։ Հույս ունեն աջակցություն ստանալ՝ ցորենի ու վառելիքի տեսքով, որպեսզի մնացած հողերը մշակեն։
Աղբյուր` Փաստինֆո
