Այսօր այցելել եմ Ոսկեպար, որտեղ հանդիպում ունեցա բնակիչների հետ. տելեգրամյան իր ալիքում գրել է վարչապետ Նիկոլ Փաշինյանը:
Նշենք, որ նրա նախորդ այցը եղել է մեկ ամիս առաջ, թեև խոստացել էր, որ մարտի 18-ի հանդիպումից 10 օր հետո նորից կգա Ոսկեպար։
Իսկ այդ ընթացքում շատերի ուշադրությունն է սևեռվել Ոսկեպարի վրա։
Այսօրվա հանդիպումը տևել է մեկ ժամ։
Անվտանգության աշխատակիցներն աշխատել են խիստ ռեժիմով։ Դահլիճում չի թույլատրվել ոչ մի նկարահանում։ Մասնակիցների թիվը եղել է սահմանափակ։
Տավուշի թեմից հայտնել են, որ Բագրատ Սրբազանը չի մասնակցի հանդիպմանը։
Նշենք նաև, որ Հայկական պետականության համար կոորդինացնող շտաբը հայտարարություն էր տարածել՝ հայտնելով, որ Ոսկեպարում վարչապետի հետ հանդիպմանը սահմանափակվել է մասնակիցների մուտքը դահլիճ։
«Մասնավորապես քաղաքագետ Սուրեն Պետրոսյանին, որն արդեն մեկ ամիս է բնակվում է Ոսկեպարում, թույլ չեն տալիս մտնել հանդիպման սրահ։ Ի պատասխան, ոսկեպարցիներն ասում են, որ այդ դեպքում իրենք կբոյկոտեն հանդիպումը։ Իրավիճակը շարունակում է լարված մնալ։
Սուրեն Պետրոսյանն ահազանգում է: Ոսկեպարում վարչապետի հետ հանդիպումը փակ է, մարդկանց արգելել են լուսանկարել կամ տեսագրել», – նշված է հաղորդագրության մեջ։
