Քաղաքագետ Դավիթ Ստեփանյանը հասկանում է ՀՀ առաջին նախագահ Լևոն Տեր-Պետրոսյանի առաջարկի տրամաբանությունը, որ ԼՂ բանակցությունների վերաբերյալ բոլոր փաստաթղթերը պետք է հրապարակվեն, սակայն չի հասկանում տրամաբանությունը, թե ինչու հենց 2019 թվականից։ Այս մասին նա ասաց Azg.am-ի թղթակցի հետ զրույցում։
Հիշեցնենք, որ Լևոն Տեր-Պետրոսյանը երեկ արձագանքել էր Փաշինյանի՝ բանավեճի հրավերին՝ նշելով՝ եթե վերջինս ցանկանում է, որ հանրությունն իմանա ողջ ճշմարտությունը ղարաբաղյան խնդրի կարգավորման դիվանագիտական գործընթացի մասին, ապա պետք է հրապարակի Մինսկի խմբի համանախագահների կողմից պաշտոնապես ներկայացված խաղաղության բոլոր (այդ թվում՝ 2019թ. հունիսի) պլանները և հայկական դիվանագիտության պաշտոնական պատասխանները դրանց։
«Լեռնային Ղարաբաղի հիմնախնդիրը շատ ավելի վաղուց է ծագել՝ առնվազն 88 թվականից սկսած։ Այս առումով ի՞նչ է նշանակում փաստաթղթերը հրապարակել 2019-ից։ Իսկ ինչո՞ւ չի ուզում փաստաթղթերը հրապարակվեն սկսած 1992-ից։ Այսինքն՝ բանակցային գործընթացը փաստացի սկսել է 92 թվականից, ուրեմն ինչո՞ւ 2019 թվականից. ես տրամաբանությունը չեմ հասկանում։
Կրկնում եմ՝ կիսում եմ տրամաբանությունը, որ հնարավոր է փաստաթղթեր հրապարակել, բայց ինչո՞ւ19-ից։ Պետք է հրապարակել փաստաթղթերն առնվազն 1992-ից սկսած, երբ ԵԱՀԿ Մինսկի խումբն ստեղծվել է»,- ասաց Դավիթ Ստեփանյանը։
Ըստ քաղաքագետի՝ սա կլինի տրամաբանական և արդարացի, որովհետև եթե ցանկանում ենք ամբողջական պատկեր ստանալ, պետք է հրապարակվի ամբողջ փաստաթղթային ցանկը։
«Այլապես մենք ստանալու ենք կիսատ պատկեր՝ պատկերավոր ասած՝ Նիկոլ Փաշինյանի մեղքի մասնաբաժինը։ Դա է ուզում Լևոն Տեր-Պետրոսյանը։ Իսկ Լևոն Տեր-Պետրոսյանը չի՞ ուզում, որ իր մեղքի մասնաբաժինը հրապարակվի, Ռոբերտ Քոչարյանի կամ Սերժ Սարգսյանի մեղքի մասնաբաժինը հրապարակվի։
Բանակցությունների արատավոր ընթացքին սկիզբ է դրվել առնվազն 1996 թվականին Լիսաբոնից, և այստեղից տրամաբանական է, որ եթե ուզում ենք իմանալ ճշմարտությունը, պետք է հրապարակվեն բանակցային բոլոր փաստաթղթերը։
Եվ այն, որ մինչ օրս բոլոր փաստաթղթերը չեն հրապարակվել, շատ բանի մասին է խոսում։ Դա խոսում է այն մասին, որ թերացումներ կան և՛ ՀՀ իշխանությունների, և՛ մասնակից պետությունների կողմից, որոնք, իհարկե, չեն ցանկանա, որ այդ ամենը հրապարակվի»,- ամփոփեց Դավիթ Ստեփանյանը։
