Հասմիկ Պողոսյանի ՖԲ էջից, –
Թուրքիայի պատմությունը ազգերին ու քաղաքակրթությունները ջնջելու պատմություն է: Սա պատմական ճշմարտություն է: Դա մի երկիր է, որի էջերը ներկված են ոչ միայն հայ ազգի արյունով, որ հազարամյակներ շարունակ ապրում և արարում էր իր պատմական բնօրրանում՝ Հայկական բարձրավանդակում…
Օգոստոսի 7- ը ասորի ժողովրդի դեմ իրականացված ցեղասպանության զոհերի հիշատակության օրն է: Մեկ դար առաջ թուրքական իշխանությունների կողմից հայերի դեմ վաղուց պետականորեն ծրագրված ցեղասպան քաղաքականության անմիջական շարունակությունը դարձավ ասորի ժողովրդի նկատմամբ տարվող ջարդերի և կոտորածների հետևողական քաղաքականությունը, որին զոհ գնացին 750 հազար ասորիներ: Արևելքն առանց քրիստոնյաների՝ այս հրեշավոր բանաձևն էր ընկած օսմանցու ցեղասպան քաղաքականության հիմքում…
Հայերն ու ասորիները միասին անցան Ցեղասպանության արհավիրքով: Եվ մեկ դար առաջ ցեղասպանության զոհ դարձած ասորիների սերունդներն այսօր շարունակում են պայքարել պատմական արդարության՝ մարդկության դեմ իրականացված ոճրագործությունների միջազգային ճանաչման ու դատապարտման համար: Պայքարում են՝ ձայն բարձրացնելով, որ չդատապարտված ցեղասպանությունները ծնում են նոր ոճիրներ, որոնց արձագանքն այսօր արդեն լսելի է ոչ միայն Մերձավոր Արևելքում, այլև աշխարհի խոշոր տերությունների մայրաքաղաքներում՝ կապված միջազգային ահաբեկչության հետ: Իսկ աշխարհը մինչ օրս չի դատապարտել: Շարունակում է հետևել, թե թուրքական պետության կողմից հովանավորվող ահաբեկչական խմբերն ինչպես են պարբերաբար հարձակվում ու սրի քաշում Մերձավոր Արևելքի տեղաբնիկ, արարող ազգերին, որոնց շարքում են արամեեախոս ասորիները…
Ամեն տարվա օգոստոսի 7-ին մենք պարտավոր ենք հիշել ցեղասպանությանը զոհ գնացած 750 հազար ասորի նահատակներին: Մեկ դար առաջ մենք միասին անցանք նույն տառապանքների միջով, և այսօր պետք է միասին պայքարենք հանուն Արդարության՝ ապացուցելով, որ ոչինչ չի հաղթի այն ազգերին, ովքեր ունեն խորը պատմական անցյալ և կանգնած են մարդկության քաղաքակրթության ակունքներում…Հայ և ասորի ժողովուրդների համար կորստյան ցավը ազգային պատկանելություն չունի…
Այսօր մեզ՝ հայերիս հետ միասին հազարամյակների ճանապարհ անցած հնագույն այս ազգի ցեղասպանության զոհերի ոգեկոչման օրն է. մարդկության և քաղաքակրթության դեմ գործադրված ևս մի ոճիր, որը ոչ մի կերպ չպետք է մոռացվի:
Ասրիները հայ զինվորի հետ կողք կողքի, ուս ուսի մարտնչելով թշնամու դեմ՝ միշտ պահել են մեր երկրի սահմանները:
2020 թվականի սեպտեմբերի 27-ի սև լուսաբացից մինչև վերջին վայրկյանը՝ Արցախի ու Հայաստանի դեմ սանձազերծված 44-օրյա պատերազմի ընթացքում մեր եղբայրների հետ անձնվիրաբար մարտնչեցին ու ընկան նաև ասորի ժողովրդի զավակները: Կռվեցին մինչև վերջին շունչը՝ զինվորն ու կամավորը…Եվ ժամանակի մեջ՝ պատմության էջերում ՝ մեր անմահացած հազարավոր եղբայրների կողքին հիշելու ենք նաև ասորի ազգի զավակներին…Նրանք մեր սրտում են:
Հենց այս օրերին էլ՝ Իրաքում թուրքական բանակի կողմից ասորական գյուղեր են ռմբակոծվել…Հնագույն քաղաքակրթությունների դեմ պատերազմը շարունակվում է:
Մենք շարունակելու ենք լինել միասին մեր պայքարում՝ հանուն պատմական արդարության վերականգնման. աշխարհի քաղաքակրթության ակունքներում կանգնած ազգերը չեն կարող ու չպիտի անհետանան: Շարունակելու ենք պայքարել միասին, շարունակել մեր ճանապարհը՝ հանուն ցեղասպանություններին զոհ գնացած մեր նախնիների ու պատերազմներում անմահացած մեր հերոս զինվորների, որ ապրեն մեր ազգերը ու ապրեցնեն իրենց …
Հասմիկ Պողոսյան
