Եռաբլուրում ծնողների նկատմամբ բռնի ուժ կիրառած և բերման ենթարկած ոստիկաններից որևէ մեկը մինչ այս պահը պատասխանատվության չի ենթարկվել:
2022 թվականի սեպտեմբերի 21-ին, Եռաբլուրում տեղի ունեցած միջադեպերի հետ կապված՝ այսօր վերջին առերեսման էին հրավիրվել զոհված զինծառայողների ծնողները։
Հիշեցնենք, որ նրանք փորձել են թույլ չտալ, որ Նիկոլ Փաշինյանը մտնի Եռաբլուր, սակայն ոստիկաններն ու բերետավորները նրանց բռնի ուժով հեռացրել են տարածքից ու բերման ենթարկել։
Ոստիկանության օրինական պահանջին չենթարկվելու համար ոստիկանները ծնողների դեմ հայց են ներկայացրել։
Առաջին առերեսումների ժամանակ ոստիկաններից մի քանիսն ասել էին, որ Երեւանի փոխոստիկանապետ Արթուր Խուդինյանն է տվել զոհվածների ծնողներին բերման ենթարկելու հրամանը, բայց հետո արդեն Խուդինյանի հետ առերեսման ժամանակ ինքն ասաց՝ ես չեմ տվել հրամանը. հունվարի 31-ին, ՔԿ-ի մոտ լրագրողների հետ զրույցում նշել է 44-օրյա պատերազմում զոհված Հակոբ Ռոստոմյանի հայրը՝ Արա Ռոստոմյանը:
«Սա վերջին առերեսումն է, որին ծնողները մասնակցում են։ Սա ձևական բնույթ է կրում»,- ասել է զոհված զինծառայողների ծնողների շահերի պաշտպան Վահան Հովհաննիսյանը:
