Արցախի շրջափակման հետևանքով Երևանում մնացած արցախցիներն այսօր՝ դեկտեմբերի 31–ին, Ամանորի նախաշեմին, երթով քայլում են դեպի Եռաբլուր, որտեղ էլ կդիմավորեն Նոր տարին:
Նրանք Երևանի քաղաքապետարանից մոմավառությամբ շարժվում են «Եռաբլուր»։ Երթին մասնակցում է նաև Արցախի պետնախարար Ռուբեն Վարդանյանի խորհրդական Արտակ Բեգլարյանը, Արցախի Մարդու իրավունքների պաշտպան Գեղամ Ստեփանյանը, ՀՀ Մարդու իրավունքների նախկին պաշտպան Արման Թաթոյանը։
Հիշեցնենք, որ 20 օր առաջ՝ դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։ Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։
