Այո՛, իմ իրավասության շրջանակներում պարզել եմ տեղեկատվությունը, ինձ պարզաբանում տրամադրվել է, լրագրողների հետ զրույցում այսօր ասաց ՄԻՊ Անահիտ Մանասյանը՝ պատասխանելով այն հարցին, թե ի վերջո ի՞նչ հաջողվեց պարզել անցած տարվա հունիսի 12-ին ոստիկանության կողմից կիրառված «Զարյա 3» նռնակների մասով։
«Չնայած այն հանգամանքին, որ ինձ էլ է տեղեկացվել, որ սա նախաքննական գաղտնիք է, ես համարել եմ, որ շատ կարևոր է՝ հանրությունը տեղեկատվություն ունենա այս հարցի հետ կապված։ Թե՛ հրապարակային եմ ասել, թե՛ նաև գործընկերների հետ եմ խոսել։ Համենայնդեպս հարցի վերաբերյալ հրապարակված տեղեկատվություն չեմ տեսել, և սա կարևոր ազդակ է, որ ևս մեկ անգամ հաղորդակցություն վարեմ գործընկերների հետ և խոսեմ այս հարցի վերաբերյալ»,- ասաց ՄԻՊ-ը։
Անահիտ Մանասյանը միաժամանկ նշեց, որ չի կարող պատասխանել լրագրողի այն հարցին՝ արդյոք կարելի էր ցուցարարների նկատմամբ «Զարյա 3» նռնակ կիրառել։
«Չեմ կարող այս հարցին պատասխանել, որովհետև անպատասխանատու հայտարարություններ կանեմ։ Սրա վերաբերյալ հետազոտություններ հիմա էլ անում ենք»,- ասաց Մանասյանը՝ խոստանալով թեմայի շուրջ նոր տեղեկատվություն ունենալու դեպքում հրապարակել։
