Միացյալ Նահանգները պատժամիջոցներ է սահմանել «Վրացական երազանք» կուսակցության հիմնադիր Բիձինա Իվանիշվիլիի նկատմամբ։ Ըստ BBC-ի՝ դրա մասին հայտնում է ԱՄՆ ֆինանսների նախարարությունը։
ԱՄՆ պետքարտուղար Էնթոնի Բլինքենը պարզաբանել է, որ Վրաստանի իշխող կուսակցության հիմնադիրը «խաթարում է Վրաստանի ժողովրդավարական և եվրաատլանտյան ապագան՝ հօգուտ Ռուսաստանի»։
Դեկտեմբերի սկզբին Բալթյան երկրներն ու Ուկրաինան պատժամիջոցներ սահմանեցին Իվանիշվիլիի դեմ։ Պատճառը Վրաստանում խորհրդարանական ընտրությունների արդյունքների դեմ բողոքի ցույցերի ճնշումն էր, երբ հաղթող ճանաչվեց «Վրացական երազանքը»։
Իվանիշվիլին Վրաստանի ամենահարուստ մարդն է: Նա երկրի վարչապետն էր 2012–2013 թվականներին։
