Կիրակի՝ մայիսի 10-ի երեկոյան, Աթենքի քաղաքապետարանի Բարեկամության սրահում տեղի ունեցավ Հայոց ցեղասպանության 111-րդ տարելիցին նվիրված գեղարվեստական միջոցառում՝ կազմակերպված Հունաստանի հայերի միության և Աթենքի քաղաքապետարանի համագործակցությամբ։
«ՄԱՀԸ ՀԱՂԹԱԾ ԺՈՂՈՎՈՒՐԴԸ» խորագիրը կրող միջոցառմանը ներկա էին Աթենքի քաղաքապետարանի ներկայացուցիչներ, Ատտիկայի մարզի փոխնահանգապետեր, ինչպես նաև հունական տարբեր քաղաքական կուսակցությունների ներկայացուցիչներ, Հունաստանում ՀՀ դեսպանության ներկայացուցիչը, ով ընթերցեց դեսպան Տիգրան Մկրտչյանի պատգամը, և Հունահայոց թեմի առաջնորդ Տեր Խորեն եպիսկոպոս Առաքելյանը։
Իրենց ներկայությամբ միջոցառումը պատվեցին նաև Սոցիալ-դեմոկրատ Հնչակյան կուսակցության, Ռամկավար ազատական կուսակցության, Հայ բարեգործական ընդհանուր միության, Հունահայոց թեմի ներկայացուցիչները, Սփյուռքի գործերով հանձնակատարը, ինչպես նաև հայկական համայնքային կառույցների ներկայացուցիչներ։
Երեկոյի ընթացքում հնչեցին հայկական մշակույթը ներկայացնող երգեր, հայ մեծանուն բանաստեղծների ստեղծագործություններից հատվածներ՝ հունարեն թարգմանությամբ ասմունքների ուղեկցությամբ, ինչպես նաև ներկայացվեցին հայկական ազգային պարեր։
Մշակութային ծրագրով հանդես եկան Մկրտիչ Պողոսյանի ժողովրդական երաժշտական խումբը և «ԱՎԵՏԻՍ» հայկական ժողովրդական պարախումբը՝ հայկական մշակույթի միջոցով հանդիսատեսին փոխանցելով ազգային հիշողության, դիմակայության և վերածննդի ոգին։
Միջոցառման կազմակերպիչները շնորհակալություն հայտնեցին բոլոր մասնակիցներին, հյուրերին և աջակիցներին՝ ընդգծելով, որ նման նախաձեռնությունները կարևոր նշանակություն ունեն ոչ միայն պատմական արդարության և ազգային հիշողության պահպանման, այլև համայնքային կյանքի կենսունակության ու Սփյուռք–Հայաստան կապերի ամրապնդման գործում։
UAG
Orer
