ՍԴ նախկին նախագահ, այժմ՝ ՍԴ դատավոր Հրայր Թովմասյանը չի բացառում, որ ԱԺ-ում Նիկոլ Փաշինյանի վերջին աղմկահարույց ելույթներում հնչած ձևակերպումները ինչ-որ փուլում կարող են դառնալ Սահմանադրական դատարանի քննության առարկա։ Լրագրողների հետ զրույցում Հրայր Թովմասյանը, արձագանքելով հատկապես Արցախի վերաբերյալ Փաշինյանի հնչեցրած ձևակերպումներն իրավական տեսանկյունից մեկնաբանելու հարցին, ասաց. «Այն հարցերը, որոնք բարձրացվում են, մի փուլում կարող են դառնալ ՍԴ քննության առարկա, ուստի այս փուլում թույլ տվեք այդ հարցերին չպատասխանել»։
Հարցին՝ Փաշինյանի հայտարարությունը, որ Արցախի հարցով փաստաթուղթ չի ստորագրվի առանց հանրային լայն քննարկման, կարո՞ղ է արդյոք նշանակել հանրաքվեի անցկացում, Թովմասյանը պատասխանեց՝ հանրաքվեն ու հանրային լայն քննարկումը տարբեր ինստիտուտներ են։
«Հանրաքվեն այլ ինստիտուտ է, լայն քննարկումն այլ ինստիտուտ է։ Այսինքն, հանրային լայն քննարկումը դեռևս չի ենթադրում հանրաքվեի անցկացում, ենթադրում է հանրության տարբեր շահագրգիռ հատվածների հետ այդ հարցի քննարկում»,- ասաց Թովմասյանը՝ նշելով, որ չի կարող ասել, թե այդ քննարկումների արդյունքում ինչ փաստաթուղթ է ծնվելու, բայց մոտավորապես մտածելով, որ կարող է նման փաստաթուղթ ծնվել, որը պետք է դառնա Սահմանադրական դատարանի քննության առարկա, ինքը ձեռնպահ է մնում այդ հարցին պատասխանելուց։
Անդրադառնալով սահմանադրական փոփոխություններին՝ Հրայր Թովմասյանը նշեց, որ Սահմանադրությունը միշտ էլ կարելի է փոխել, պետք է ուղղակի գնահատել դրա անհրաժեշտությունը:
«Ընդհանրապես, Սահմանադրությունը երկու դեպքում են փոխում, մեկը իմիտացիա ստեղծելու կամ հանրության ուշադրությունը շեղելու նպատակով, որն այնքան էլ ցանկալի չէ: Երկրորդը, երբ օբյեկտիվորեն անհրաժեշտություն կա Սահմանադրությունը փոխելու: Ես տեղյակ չեմ, իմ կարծիքը կարող եմ ասել, որ այս պահին սահմանադրական փոփոխությունների անհրաժեշտություն չեմ տեսնում: Չկա որեւէ խնդիր, որ բարձրացվել է եւ ընթացնիկ օրենքների փոփոխությամբ հնարավոր չէ լուծել»,- ասաց նա:
Աղբյուր` Փաստինֆո
