Լեռնային Ղարաբաղում, ըստ վերջին տվյալների, շուրջ 20 հայ կա։ Այս մասին հայտարարել է Ադրբեջանի նախագահ Իլհամ Ալիևը:
«Նրանք, ովքեր մնացել են, շարունակում են սոցիալական օգնություն ստանալ Ադրբեջանից, սոցիալական ապահովության նախարարությունից։ Բուժում, մթերք … Նրանց կյանքն այնտեղ լիովին ապահովված է», – հավաստիացրել է Ալիևը Համառուսաստանյան պետական հեռուստառադիոընկերությանն ու ՌԻԱ Նովոստիին տված հարցազրույցում։
Նա նաև հայտարարել է, որ նախքան Ադրբեջանի հետ խաղաղության պայմանագիր ստորագրելը, Հայաստանը «պետք» է փոխի Սահմանադրությունը և համաձայնի ԵԱՀԿ Մինսկի խմբի լուծարմանը:
«Եվս երկու կետ, որ հայկական կողմը պետք է անի. առաջինը՝ փոխի իր Սահմանադրությունը, քանի որ Սահմանադրության մեջ հիշատակվում է Անկախության հռչակագիրը, որն իր հերթին տարածքային պահանջներ է պարունակում Ադրբեջանի նկատմամբ: Դրանում նախկին Լեռնային Ղարաբաղի Ինքնավար Մարզը հայտարարված է Հայաստանի մաս։ Ուստի Սահմանադրության փոփոխությունը մեր քմահաճույքը չէ, դրանք ուղղակի օբյեկտիվ պայմաններ են»,- ասել է Ալիևը։
Բաքվի երկրորդ պայմանը, հավելել է նա, ԵԱՀԿ Մինսկի խմբի լուծարումն է։
«Քանի որ այս հարցը լուծվում է կոնսենսուսով, դա ֆորմալ առումով անհնար է անել առանց Հայաստանի համաձայնության: Թեև ԵԱՀԿ Մինսկի խումբը վաղուց չի գործում, այն ֆորմալ առումով դեռևս գոյություն ունի։ Եվ մեր հարցն այն է, որ եթե Հայաստանը Ղարաբաղը ճանաչել է որպես Ադրբեջանի մաս, իսկ Մինսկի խումբը ստեղծվել է Ղարաբաղի հարցը լուծելու համար, ապա էլ ինչի՞ համար է այն անհրաժեշտ։ ԵԱՀԿ Մինսկի խումբը լուծարելու, մեզ հետ այդ հարցով ԵԱՀԿ-ին դիմելու առնչությամբ Հայաստանի դժկամությունը, հուշում է, որ «ռևանշիստների» ծրագրերը բավականին լուրջ են»,- նշել է Ադրբեջանի նախագահը։
Նշենք, որ Ալիևը նույն հարցազրույցում բացահայտել է՝ խաղաղության պայմանագրի որ կետերի շուրջ Երևանն ու Բաքուն համաձայնության չեն եկել:
«Փաստաթղթի 17 կետերից 15-ը համաձայնեցված են, մնացել է 2-ը, և Կազանում Փաշինյանի հետ իմ վերջին հանդիպման ժամանակ զգացի, որ որ Հայաստանը կարող է ընդունել այդ 2 կետը՝ այսինքն մեր պայմանները: Կետերից մեկն իրար դեմ միջազգային հայցեր չներկայացնելն է, իսկ մյուսը՝ սահմանին այլ երկրների ներկայացուցիչներին չտեղակայելը», – ասել է Ադրբեջանի նախագահը:
