Լրագրողներն այսօր ԱԺ նախագահ Ալեն Սիմոնյանին խնդրեցին մեկնաբանել Բելառուսի հասցեին իր գնահատականին հետևած՝ այդ երկրի ԱԳՆ-ի հայտարարությունը։
Հիշեցնենք՝ Մինսկում դժգոհություն էին առաջացրել Ալեն Սիմոնյանի խոսքերը, թե իրենք թույլ չեն տա, որ Հայաստանի Հանրապետությունը վերածվի մարզի և կառավարվի Բելառուսի պես։
Ալեն Սիմոնյանը հրաժարվեց մեկնաբանել Բելառուսական կողմի այն հայտարարությունը, որ «հայկական կողմը ոչ բարեկամական գործողություններ» է կատարում։
«Չեմ մեկնաբանում: Բալառուսը Բելառուս է, Հայաստանը՝ Հայաստան։ Դուք կապրեի՞ք Բելառուսում: Բելառուսը կապրի՞ Հայաստանում։ Ամեն մեկն իր երկիրն ունի, ես իմ երկրի պատասխանատուն եմ»,- ասաց ԱԺ նախագահը:
Ճշտող հարցին՝ արդյոք իր հայտարարությունները ավելի չեն վատացնել երկու երկրների հարաբերությունները, Ալեն Սիմոնյանը պատասխանեց.
«Կարծում եմ՝ Հայաստանի նկատմամբ, գործընկերոջ նկատմամբ, Հայաստանի պետականության նկատմամբ ՀԱՊԿ-ում անհարգալից վերաբերմունքն է վատացնում հարաբերությունները, Ադրբեջանի հետ 44-օրյա պատերազմ նախապատրաստելն է վատացնում հարաբերությունները և էլի շատ տարբեր բաներ են վատացնում հարաբերությունները:
Քաղաքական կուրսը ամեն պետության ընտրության հարց է: Հայաստանի համար մարդու իրավունքները, ազատությունները կարևորագույն արժեքներ են, և ես կարծում եմ, որ ամեն պետություն իր օրինակն է ընտրում: Մենք ընտրել ենք Հայաստանի ժողովրդավարացման ճանապարհը, իրենք՝ մի քիչ այլ ճանապարհ, ոչ այնպիսին, ինչպիսին Հայաստանը»:
Լրագրողներից մեկի դիտարկմանը, թե նա դիվանագիտորեն չի ձևակերպում իր ասելիքը, ԱԺ նախագահը նկատեց՝ ակնհայտ է, որ դա իր բնավորության, խառնվածքի մի մաս է:
«Բացի այդ էլ՝ ես պառլամենտական գործիչ եմ և ավելի ազատ եմ, քան մեր որևիցե գերատեսչության պատասխանատվության ոլորտ ներկայացնող մարդիկ»,- ասաց նա:
Անդրադառնալով Բելառուսի ԱԳՆ-ի բողոքի նոտային, ասաց՝ լուրը կարդացել է, այլ տեղեկություն չունի:
«Հայաստանը ծայրագավառ չի լինելու, Հայաստանը քաղաքական կախվածության մեջ չի լինելու, Հայաստանն իր ինքնիշխանության մակարդակը բարձրացնելու է, և Բելառուսի կառավարման օրինակը իմ երկրի համար, ինձ համար անընդունելի է»,- շեշտեց Ալեն Սիմոնյանը:
Նրա խոսքով՝ Հայաստանն ազատ երկիր է՝ իր ազատ մեդիաներով, մարդու իրավունքներով ու օրենքի գերակայությամբ:
Հիշեցնենք՝ մայիսի 5-ին Բելառուսի ԱԳՆ է հրավիրվել Բելառուսում Հայաստանի գործերի ժամանակավոր հավատարմատար Արթուր Սարգսյանը։
Հայ դիվանագետին հայտարարվել է վճռական բողոք և հանձնվել համապատասխան նոտա՝ կապված հայկական կողմի վերջին անբարյացակամ գործողությունների հետ։
