Իշխանության ներկայացուցիչը հերթական պոպուլիստական հայտարարությունն է արել՝ առանց հստակեցնելու, թե ինչ նկատի ունի, Azg.am-ի թղթակցի հետ զրույցում ասաց տնտեսագետ Սուրեն Պարսյանը՝ անդրադառնալով ԱԺ փոխնախագահ Հակոբ Արշակյանի այն հայտարարությանը, որ Հայաստանը բարձր տեխնոլոգիաների ոլորտում ուղղակի մրցակից չունի, և ոլորտը շարունակական աճ է գրանցում։
«Եթե Հակոբ Արշակյանը հայտարարում է, որ բարձր տեխնոլոգիաների ոլորտում նախորդ տարի 60 տոկոսից ավելի աճ է արձանագրվել, ապա նա աճի տեմպը նկատի ունի։ Բայց աճի տեմպով չէ, որ որոշվում է՝ այս կամ այն երկիրը առաջատար է աշխարհում, թե ոչ։
Բոլոր գիտեն, որ IT ոլորտում համաշխարհային առաջատար հանդիսանում է Միացյալ Նահանգները՝ Սիլիկոնային հովտով։ Իսկ Արշակյաը փորձում է զուտ աճի տեմպը ցույց տալ՝ որպես առաջատարի։ Աճի տեմպով Հայաստանն, այո՛, կարող է առաջատար լինել, բայց դա չի նշանակում, որ երկիրը բարձր տեխնոլոգիաների ոլորտում է առաջատար։
Բացի այդ՝ երբ ԱԺ փոխնախագահն ասում է «բարձր տեխնոլոգիաներ», պետք է հասկանա, որ դա միայն IT-ն չի։ Նա IT-ն շփոթում է HI-Tech-ի հետ: 60 տոկոսի մեծ մասն IT ոլորտն է, ոչ թե Hi-Tech-ը։ Իսկ Հակոբ Արշակյանը դրանք նույնիսկ իրարից չի տարբերում»,- ասաց Սուրեն Պարսյանը։
Տնտեսագետի խոսքով՝ բարձր տեխնոլոգիաների ոլորտում Հայաստանում նախորդ տարի գրանցված 60 տոկոսից ավելի աճը հիմնականում պայմանավորված է ռուսական IT, ոչ թե Hi-Tech ընկերությունների՝ մեր երկիր մուտքով։
«Հայաստանը հաստատ Hi-Tech-ով առաջատար դիրքերում չէ, ոչ էլ աճի տեմպերով է առաջաար։ IT-ով միգուցե առաջատար է, բայց ոչ՝ Hi-Tech-ով։ Նորից եմ ասում, բարձր տեխնոլոգիաները միայն IT-ն չեն, այլ ավելի լայն են. դրա մեջ մտնում են ինժեներիան, ինովացիաները, know-how-ները։ Իշխանսությունները թող ասեն, թե քանի՞ գյուտ է գրանցվել, քանի՞ խոշոր ստարտափեր է եղել, այդ ժամանակ էլ կհասկանանք՝ ինչի մասին է խոսքը։
Իմիջիայլոց, այս տրամաբանությամբ նաև մեր նախարարություններն են գործում. երբ ասում են Բարձր տեխնոլոգիաների նախարարություն, իրենց թվում է՝ պետք է զբաղվեն միայն ՏՏ ոլորտով։ Ուզում եմ ասել՝ սա ոչ միայն Հակոբ Արշակյանին բնորոշ, այլ համակարգային խնդիր է, որ մեր պետական այրերը բարձր տեխնոլոգիաները շփոթում են տեղեկատվական ոլորտի հետ»,- ամփոփեց տնտեսագետը։
