Երբ ԱԺ փոխնախագահ Հակոբ Արշակյանը հայտարարում է, որ Հայաստանը բարձր տեխնոլոգիաների ոլորտում մրցակից չունի և մրցակցային բոլոր պարամետրերով առաջին տեղում է, ընդամենն ականջահաճո հայտարարություն է անում՝ ուղղված բացառապես իրենց կոնտինգենտին։ Azg.am-ի թղթակցի հետ զրույցում այս մասին ասաց տեղեկատվական անվտանգության փորձագետ Տիգրան Քոչարյանը՝ անդրադառնալով ԱԺ փոխխոսնակի այն հայտարարությանը, որ Հայաստանը բարձր տեխնոլոգիաների ոլորտում մրցակցային առավելության տեսանկյունից ուղղակի մրցակից չունի, և ոլորտը շարունակական աճ է գրանցում։
Մեր զրուցակցի խոսքով՝ Հակոբ Արշակյանի նման հայտարարությունն ուղղված է այսպես ասած «Հ1-ի գունագեղ Հայաստանում» ապրողներին, որտեղ ամեն ինչ լավ է, տնտեսությունը ծաղկում է, բոլորը հարուստ են, չկան Արցախի խնդիր և 100 հազարից ավելի փախստականներ։
«Մի անեկդոտ պատմեմ, երևի ամեն ինչ պարզ կլինի. ուրեմն, մեկը գնում է բժշկի, ասում է՝ «Բժիշկ ջան, կնոջս հետ ոչ մի կերպ չի ստացվում, իսկ հարևանս ասում է, որ իր մոտ նույնիսկ 20 տարեկանների հետ է ստացվում։ Ի՞նչ անեմ»։ Բժիշկն ասում է՝ դու էլ ասա։
Հիմա նույնն էլ Հակոբ Արշակյանն է։ Թող ինքն էլ ասի, և եթե իր ասելուց ինչ-որ բան փոխվի, շատ լավ կլինի։ Որովհետև թվերն ու իրականությունը բացարձակապես տարբեր բաներ են, և դա տեսանելի է բոլոր մակարդակներում։ Դրա համար էլ նման հայտարարությունները մեկնաբանելը լուրջ չէ»,- ասաց Տիգրան Քոչարյանը։
Տեղեկատվական անվտանգության փորձագետն ընդգծեց՝ աշխարհի՝ բարձր տեխնոլոգիաների մակարդակով իսկապես առաջատար երկների առաջին դեմքերն անգամ նման համաձակ պնդում չեն անում, չեն հայտարարում, որ իրենք մրցակցությունից դուրս են։
«Պատճառն այն է, որ այլ երկրներում բարձր պաշտոններ զբաղեցնում են ադեկվատ մարդիկ, ոչ թե Հակոբ Արշակյանի նման մարդիկ։ Դրա համար էլ այդ երկրները զարգանում են։ Իսկ ահա Հայաստանի տնտեսության թռիչքաձև աճը հիմնականում պայմանավորված է իմպորտով։
Բարձր տեխնոլոգիաների ոլորտում թռիչքի մասին խոսելով՝ այս իշխանությունների միակ փրկությունը բուքմեյքերական ընկերություններում կատարվող խաղադրույքներն են, որոնք, որքան հիշում եմ, անցել են 5-6 տրիլիոն դրամից։
Եթե Հայաստանի տնտեսությունը «վիվառո-տնտեսություն է», ապա երևի աշխարհում Հայաստանի նախադեպն իսկապես չկա»,- ամփոփեց Տիգրան Քոչարյանը։
