Երևանի առաջին ատյանի ընդհանուր իրավասության դատարանում, դատավոր Մնացական Մարտիրոսյանի նախագահությամբ, այսօր շարունակվել է Ավետիք Չալաբյանի գործով դատական նիստը, որի ընթացքում հարցաքննվում են վկաները։
«Համախմբում» շարժման ներկայացուցիչ Ավետիք Չալաբյանի դեմ ցուցմունք տված Թոռնիկ Ալիյանը պատմել է. «Առաջին հանդիպմանը ես իմ տեղակալին ասել եմ, որ դիմավորեն, ես համալսարանում չեմ եղել, ուղեկցեն Էմմա Սարգսյանին իմ աշխատասենյակ, և ես եկել ու մոտեցել եմ նրան: Սկզբում գյուղատնտեսական ոլորտի շրջանակներում էր քննարկումը, հետո քաղաքական դաշտ։ Մեկ տարի անցել է, մանրամասները չեմ հիշում: Տհաճ բաները փորձում եմ չհիշել, այդ պատճառով հիշում եմ այն, ինչ գյուղատնտեսական շրջանակներում է եղել»:
Վկան դատարանում ասում է, որ տհաճ բաներն աշխատում է չհիշել, երբ իր իսկ ցուցմունքից կախված է մեղադրյալի ճակատագիրը։
Թոռնիկ Ալիյանի «տհաճ բաները» փորձեց ճշտել գործով մեղադրող դատախազը՝ ինչու էր տհաճ թեմա։
Թոռնիկը պատասխանեց՝ քանի որ քաղաքական թեմա էր:
Քաղաքական թեմայով է մաղադրանք ներկայացվել Ավետիք Չալաբյանին, բայց նրա դեմ ցուցմունք տված Թոռնիկ Ալիյանը քաղաքականությունից խոսել չի ուզում։ Այս հանգամանքը ստիպեց, որպեսզի դատախազը ճշտի՝ եթե տհաճ թեմա էր, ինչու է ինքը շարունակել հանդիպումներ ունենալ նրանց հետ։
Պատասխան՝ «Մեկ հանդիպում եղել է Չալաբյանի եւ երկու անգամ Էմմա Սարգսյանի հետ: Էմմա Սարգսյանն է Չալաբյանին ներկայացնողը եղել: Ասել է՝ քաղաքական ուժի ներկայացուցիչ է, ես հարցրել եմ՝ որ քաղաքական ուժի, Սերժ Սարգսյա՞ն, թե՞ Ռոբերտ Քոչարյան, նա ասել է՝ ոչ մեկի հետ կապ չունեն: Չալաբյանի հետ հանդիպումը տեւել է կես ժամ, նա իր հայացքներն է ներկայացրել, թե ինչ գործունեություն է ծավալելու հայրենիքի համար: Երբ ես Էմմա Սարգսյանին հեռախոսազանգով ասացի՝ չեմ ուզում քաղաքական բանի մեջ ներքաշվենք, 2000 հոգու հետ կապված հարցը վերջին քննարկմանն է եղել»։
Թոռնիկ Ալիյանն ասել է, որ համացանցում ձայնագրությունն ինքը չի հրապարակել։
«Այդ ձայնագրությունն ավելի շատ ինձ է վնասում, որովհետև ոնց որ մենակ ես եմ խոսում: Հրապարակված ձայնագրության մեջ կարեւոր մասեր էլ կան, օրինակ՝ ես մերժել եմ այդ ամենը»:
Հիշեցնենք, որ հասարակական-քաղաքական գործիչ Ավետիք Չալաբյանին մեղադրանք է առաջադրվել այն բանի համար, որ նա 2022 թվականի մայիսի 4-ին Երեւան քաղաքի Աբովյան 12 հասցեում գտնվող «Դալան» ռեստորանում, այնուհետեւ մայիսի 08-ին՝ Հայաստանի ազգային ագրարային համալսարանի ուսանողական խորհրդի սենյակում ուսանողական խորհրդի նախագահ Թոռնիկ Ալիյանին նյութապես շահագրգռել է՝ ընդդիմության ցույցերին մասնակցելու և այլ իր հետ մասնակիցներ բերելու համար առաջարկելով 2 միլիոն դրամ։
Այս գործով Ավետիք Չալաբյանը 2022 թ. մայիսի 14-ին կալանավորվել էր։
2,5 ամիս կալանքի տակ մնալուց հետո Չալաբյանը 15 միլիոն դրամ գրավի դիմաց ազատ է արձակվել։
