Երկու օր առաջ մենք իմացանք, որ ընդդիմադիր «ՀայաՔվե» կուսակցությունը կոչ է արել Եվրահանձնաժողովի, Եվրախորհրդարանի և Եվրոպայի խորհրդի ներկայացուցիչներին՝ հետաձգել հակառուսական «Եվրոպական քաղաքական համայնքի» «գագաթնաժողովը» Հայաստանում։ Հաջորդ օրը կոչին միացան ևս վեց ընդդիմադիր կուսակցություններ. Հանրապետականը, «Ժառանգությունը», ՀՅԴ-ն, «Բարգավաճ Հայաստանը», ՀԱԿ-ը և Արցախի ժողովրդավարական կուսակցությունը։
Ես գտնում եմ, որ սա խիստ տեղին նախաձեռնություն է, և ցանկանում եմ իմ աջակցությունը հայտնել այս հայտարարությանը։
Նախ և առաջ, այս գագաթնաժողովը Եվրոպական միության կամ ԵՄ որևէ այլ պաշտոնական կառույցի պաշտոնական գագաթնաժողով չէ։ Սա հակառուսական դաշինքի գագաթնաժողով է, որը ստեղծվել է որոշակի առաջնորդների կողմից՝ Հայաստանին հակառուսական բլոկի մեջ ներքաշելու մտադրությամբ։
Երկրորդ՝ ինչո՞ւ է այս գագաթնաժողովն անցկացվում ընտրություններից ընդամենը մեկ ամիս առաջ։ Մի՞թե բոլորի համար ակնհայտ չէ, որ սա փորձ է՝ ազդելու ընտրությունների վրա և միջամտելու Հայաստանի ներքին քաղաքականությանը։ Այլ կերպ ասած՝ անել ճիշտ այն, ինչի մեջ այդ առաջնորդները մեղադրում են ուրիշներին։ Մի՞թե սա հենց այն «հիբրիդային պատերազմը» չէ, որի մասին դուք խոսում էիք։
Եվ, ի դեպ, որտե՞ղ էիք դուք այս 8 տարիների ընթացքում։ Մինչ այս, դուք Հայաստան գալու հնարավորություն չունեի՞ք։ Ինչո՞ւ եք հենց հիմա եկել Հայաստան։
Դուք չհիշեցիք մեր մասին 2020 թվականի պատերազմի ժամանակ, երբ մեր տղաները սպանվում էին թուրքական ու իսրայելական անօդաչուներից։ Որտե՞ղ էիք դուք այն ժամանակ։ Փորձեցի՞ք արդյոք կանգնեցնել պատերազմը։
2020 թվականին, երբ հայերը գնացել էին օգնություն խնդրելու, ՆԱՏՕ-ի գլխավոր քարտուղարը նրանց հայտարարեց. ,Թուրքիան արժեքավոր դաշնակից է», և ոչինչ չարեց պատերազմը կանգնեցնելու համար։ Ինչո՞ւ եք հիմա գալիս Հայաստան, եթե մենք ձեզ համար այդքան էլ արժեքավոր չենք։
Սպառնացե՞լ եք արդյոք Ադրբեջանին կամ Թուրքիային պատժամիջոցներով՝ Կովկաս ահաբեկիչներ բերելու համար, ինչը համընդհանուր ճանաչված փաստ էր։ Ոչ այնքան։ Իսկ ի՞նչ կասեք 2023 թվականին Արցախում իրականացված էթնիկ զտման մասին. փորձեցի՞ք արդյոք այն ժամանակ կանգնեցնել այն կամ պատժամիջոցներ կիրառել։ Այն ժամանա՞կ եկաք Հայաստան։
Եթե այս այցը կապված է Հայաստանին օգնելու և նրա հետ գործընկերություն հաստատելու ձեր ցանկության հետ, ինչո՞ւ դա չեք անում առանց նախապայմանների։ Փոխարենը դուք մեզ ստիպում եք մտնել Ռուսաստանի հետ ձեր պատերազմի մեջ, որը հսկայական վնաս կհասցնի մեր ժողովրդին. ինչո՞ւ։
Եթե այս եվրոպական շոուն իրոք Հայաստանի մասին լիներ, դուք այստեղ կլինեիք, երբ մենք իսկապես ձեր կարիքն ունեինք… երբ մեր տղաները կռվում էին ահաբեկիչների դեմ, երբ մեր հայրենակիցները տեղահանվում էին իրենց հայրենիքից, երբ Իրանի հետ մեր սահմանամերձ շրջանը զավթվում էր ԱՄՆ-ի և նրա դաշնակիցների կողմից։ Այն ժամանակ դուք այստեղ չէիք։ Իսկ երբ պետք է օգնել դավաճան ռեժիմին՝ գողանալու ընտրությունները և շարունակելու Հայաստանը հանձնել թշնամուն, դուք իսկույն ևեթ հայտնվում եք։
Ընկերները քո մասին չեն հիշում, երբ ուզում են քեզնից ինչ-որ բան ստանալ և քեզ օգտագործել իրենց նպատակների համար։ Նրանք քո մասին հիշում են, երբ դու նեղության մեջ ես, երբ օգնության կարիք ունես։ Հենց այդ ժամանակ էլ հասկանում ես, թե ովքեր են քո իսկական ընկերները։
Արթուր Խաչիկյան, քաղաքագետ
