Չի բացառվում, որ ինչ-որ պահի Վլադիմիր Պուտինը կարող է հայտնվել մեղադրյալի աթոռին. Հաագայի միջազգային քրեական դատարանում ասել է գլխավոր դատախազ Քարիմ Խանը։
«Կարծում եմ՝ նրանք, ովքեր դա անհնարին են համարում, պատմություն չգիտեն, որովհետև նացիստական գլխավոր ռազմական հանցագործները, Միլոշևիչը, Կարջիչը, Չարլզ Թեյլորը, նախկին վարչապետ Ժան Կամբանդան Ռուանդայից, նրանք բոլորը ուժեղ, ազդեցիկ մարդիկ էին և նրանք բոլորը հայտնվեցին դատարանի դահլիճում։
Սա հիմք է տալիս հուսալու, որ օրենքը կարող է հաղթանակել, որքան էլ դա դժվարին լինի»,- ասել է Քարիմ Խանը։
Արևմուտքը սվիններով է ընդունում Պուտինին ու Ռուսաստանին։ Պատճառը Ուկրաինայի դեմ պատերազմն է ու Ռուսաստանի օկուպացրած տարածքը։ Հաագայի դատարանը որոշել է պատժել «ռազմական հանցագործությունների հեղինակին», այդ դեպքում որտե՞ղ է այդ դատարանի անաչառությունն ու անկողմնակալությունը, երբ խոսքը վերաբերում է Ալիևին։
3 ամսից ավելի Ադրբեջանը դանդաղ ցեղասպանության է ենթարկում 120 հազար արցախցու։ Ժողովրդավարության «բնօրրան» Եվրոպան առաջինը պետք է միջազգային կոնվենցիաներով առաջնահերթությունը տա արցախահայության ինքնորոշման իրավունքին։
Ադրբեջանը հարձակվել է նաև ՀՀ ինքնիշխան տարածքների վրա, պատերազմական գործողությունների պատճառով հարյուրավոր զինվորներ են սպանվել, որոնք գտնվել են իրե՛նց Հայրանիքում, իրե՛նց պետության տարածքում։ Ադրբեջանը մի քանի հարյուր ռազմագերիների է պահում ու չի վերադարձնում։ Պատերազմական այսպիսի աղաղակող հանցագործությունների վրա աշխարհն ու Հաագայի դատարանն աչք են փակում, որովհետև Ադրբեջանի նավթն ու գազը թանկ են մարդկային կյանքերից, որովհետև Ադրբեջանը Եվրոպայի «հուսալի գործընկերն է»։
