Երևան քաղաքի ընդհանուր իրավասության դատարանում` դատավոր Մնացական Մարտիրոսյանի նախագահությամբ, այսօր սկսվեցին «Համախմբում» նախաձեռնության անդամ, հասարակական քաղաքական գործիչ Ավետիք Չալաբյանի գործով նախնական դատալսումները:
Նիստի մեկնարկին պաշտպանական կողմը հայտնեց՝ իրենք չեն ծանոթացել վարույթի նյութերին, ընդ որում` ոչ իրենց մեղքով:
Ըստ Վարազդատ Հարությունյանի՝ վարույթի նյութերը դատարանին տրամադրվել են հուլիսի 12-ին, իսկ Ավետիք Չալաբյանին` հուլիսի 20-ին:
Հղում կատարելով Մարդու իրավունքների եվրոպական դատարանի հայտնած իրավական դիրքորոշումներին` Հարությունյանը հավելեց, որ Քրեակատարողական հիմնարկում պահվող կալանավորին վարույթի նյութերին ծանոթանալու համար 4 կամ 5 օր տրամադրելը ողջամիտ ժամկետ չէ:
«Վարույթն իրականացնող քննիչը խախտել է մեղադրյալի իրավունքները եւ օրենսդրությունը` ժամանակին չտրամադրելով մեղադրական եզրակացությունն ու գործի նյութերը»,- ասաց Վարազդատ Հարությունյանը։
Քաղբանտարկյալ Չալաբյանը ևս հաստատեց՝ գործի նյութերն իրեն չեն տրվել։
Սակայն դատավոր Մարտիրոսյանը պնդեց, որ պաշտպանն ինքը կարող էր ծանոթանալ գործի նյութերին ու շարունակեց դատավարությունը:
Արդյունքում պաշտպանական կողմը դատարանի գործողություններն ապօրինի որակեց ու լքեց նիստերի դահլիճը։
Անհարգալից վերաբերմունք դատարանի նկատմամբ. արձանագրեց Մնացական Մարտիրոսյանը, դատական սանկցիա կիրառեց պաշպտապնների նկատմամբ ու մեկ ժամով ընդմիջեց նիստը:
Ընդմիջումից հետո դատավոր Մարտիրոսյանը նշեց՝ եթե Չալաբյանի պաշտպանները չներկայանան նիստին, ապա դատարանը Հանրային պաշտպանի գրասենյակ կդիմի՝ գործին նոր պաշտպան ներգարվելու համար։
Չալաբյանն առարկեց. «ինձ համար հանրային պաշտպան ունենալն անընդունելի է։ Կոչ եմ անում վերականգնել իմ պաշտպանների իրավունքը»։
Դատարանը մինչև հուլիսի 27-ը՝ ժամը 16:30-ը, հետաձգեց նիստը:
Հիշեցնենք, որ Ավետիք Չալաբյանին մեղադրանք է առաջադրվել նախկին Քրեական օրենսգրքի 236-րդ հոդվածի 2-րդ մասով, այսինքն՝ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը:
Հուլիսի 1-ից ուժի մեջ մտած Քրեական օրենսգրքով այդ հոդվածն ապաքրեականացված է եղել, սակայն օրենքի ուժի մեջ մտնելուց և Չալաբյանի երկամսյա կալանավորման ժամկետը լրանալուց առաջ օրենսգրքում լրացում է կատարվել, վերը նկարագրված արարքը քրեականացվել է, եւ այդ պայմաններում՝ Չալաբյանի նկատմամբ քրեական հետապնդումը շարունակվում է:
