Թեև Թեհրանում Ադրբեջանի դեսպանատան վրա հարձակվողը խոստովանել է, որ այդ քայլի հմար անձնկան դրդապատճառներ է ունեցել, բայց դրան հաջորդել են հապճեպ մեկնաբանություններ ադրբեջանական իշխանությունների կողմից. գրում է իրանական Mehr գործակալությունը:
«Բոլոր ապացույցները՝ ներառյալ հարձակվողի խոստովանությունները, ցույց են տալիս, որ այդ գործողության շարժառիթը անձնական է եղել, ուստի ադրբեջանական իշխանությունների կողմից կեղծ արտահայտությունների օգտագործումը, ինչպիսին է ահաբեկչական կամ ծրագրված միջադեպը, բացարձակապես անընդունելի է:
Բացի այդ, պայմանավորված այն հանգամանքով, որ Իրանի Իսլամական Հանրապետությունը մեծ նշանակություն է տալիս Ադրբեջանի հետ հարաբերություններին, երկիրն անմիջապես արձագանքել է միջադեպին ամենաբարձր մակարդակով եւ ձեռնարկել բոլոր հնարավոր միջոցները վիրավորներին բուժելու, սպանված դիվանագետի հիշատակը հարգելու եւ դեսպանատան աշխատակիցների ու նրանց ընտանիքների ցավը մեղմելու համար:
Հարձակվողը, իր իսկ խոստովանությամբ, մի քանի անգամ այցելել է Ադրբեջանի դեսպանատուն՝ կնոջ վիճակի մասին տեղեկանալու համար, եւ ոչ մի պատասխան չի ստացել։ Ադրբեջանի դեսպանատունը նույնպես չի պատասխանել Իրանի արտաքին գործերի նախարարության գրավոր հարցմանը՝ խնդրելով պարզել հարձակվողի կնոջ վիճակը:
Սա այն դեպքում, երբ չնայած Շահ Չերաղի ահաբեկչության ժամանակ մի քանի ահաբեկիչներ եւ նրանց կողմնակիցներ ադրբեջանական անձնագրեր ունեին, Իրանի Իսլամական Հանրապետությունը երբեք չի փորձել այդ հարցը դիտարկել որպես ահաբեկիչների եւ Ադրբեջանի կառավարության միջեւ կապի առկայություն։
Իրանից ադրբեջանցի դիվանագետների տարհանումը եւ Թեհրանում Ադրբեջանի քաղաքական առաքելության գործունեության կասեցումն ավելի շատ նման է Իրանի դեմ քարոզչական մթնոլորտ ստեղծելու փորձին։
Իրանի Իսլամական Հանրապետությունը միշտ ողջունել է Ադրբեջանի կառավարության եւ ժողովրդի հետ ջերմ հարաբերությունները, եւ չնայած երկրի քաղաքական, անվտանգության եւ ԶԼՄ-ների հետ կապված որոշ տարաձայնություններին, խելամիտ մոտեցում է ցուցաբերում լարվածությունը կառավարելու հարցում, որպեսզի թույլ չտա վնաս հասցնել Թեհրանի եւ Բաքվի կապերին»,-գրել է Mehr-ը։
