Արցախիները շարունակում են հսկել Ասկերան-Ակնա ճանապարհը։ Նրանք վճռել են ամբողջ գիշեր մնալ այնտեղ, որպեսզի թույլ չտան ադրբեջանական «Կարմիր մահիկի» «հումանիտար բեռների» անցկացումը Արցախ՝ Ստեփանակերտ։
Ռուսական խաղաղապահ զորակազմի ներկայացուցիչը Ասկերանի վարչակազմի ղեկավար Համլետ Ապրեսյանին հավաստիացրել է, որ իրենք թույլ չեն տա բեռնատարներին առաջ շարժվել։
Նշենք, որ «հումանիտար օգնություն» բերողները հագել են «Կարմիր մահիկի» համազգեստ։ Նրանք Ակնա-Ասկերան ճանապարհին՝ բեռնատարների մոտ, վրաններ են տեղադրել և որոշել գիշերն անց կացնել այնտեղ։
Լուրեր են շրջանառվում, որ նրանք հենց այն նույն «էկոակտիվիստներն» են, որոնք 2022 թվականի դեկտեմբերին փակեցին Բերձորի միջանցքը՝ Արցախը դարձնելով պատանդ։ Հիմա էլ «Կարմիր մահիկի» աշխատակիցների շորեր են հագել ու ներկայանում են որպես հումանիստ։
44-օրյա պատերազմում որդի կորցրած արցախցի կինն ասել է՝ ադրբեջանցիների բերած «օգնությունը» ոչ թե ալյուր է, այլ մեր տղաների արյունն է։
Ասկերան-Ակնա ճանապարհը փակած, բեռնատարների մուտքն արգելող արցախցիները ռուս խաղաղապահների ավտոմեքենայի մեջ հայտնաբերել են մի ադրբեջանցու, որը նպատակ է ունեցել անցնել Արցախի՝ հայկական վերահսկողության տակ գտնվող տարածք։
