Ավստրալիայի բաց առաջնությանն իր 3-րդ հաղթանակից հետո հայկական արմատներով ռուս թենիսիստ Կարեն Խաչանովը տեսախցիկի էկրանին գրել էր՝ «Արցախ, մնա ուժեղ»՝ այսկերպ հայտնելով իր աջակցությունը շրջափակված Արցախին։
«Անընդունելի սադրանք՝ ուղղված Ադրբեջանի դեմ». Ադրբեջանի թենիսի ֆեդերացիան (ATF) այսպես է որակել Խաչանովի քայլը և բողոք հղել Թենիսի միջազգային ֆեդերացիային (ITF)՝ պահանջելով պատժել հայ թենիսիստին։
Ադրբեջանի թենիսի ֆեդերացիայի ղեկավար Օկտայ Ասադովը դիմել է նաև Ռուսաստանի թենիսի ֆեդերացիայի նախագահ Շամիլ Տարպիշչևին՝ Խաչանովի նկատմամբ «կոշտ միջոցների» դիմելու խնդրանքով։
Ըստ Ադրբեջանի թենիսի ֆեդերացիայի՝ Տարպիշչևն ասել է, որ «լրջորեն մտահոգված է այս միջադեպով», մոտ ապագայում «որոշակի միջոցներ» կձեռնարկվեն։
Ադրբեջանը հետապնդում է աշխարհահռչակ այն հայերին, ովքեր հանրային հրապարկումնրով իրենց աջակցությունն են հայտնում Արցախին։
Օրերս Հայաստանի ֆուտբոլի ազգային հավաքականի նախկին ավագ Հենրիխ Մխիթարյանը Միլանի «Ինտերի» պաշոնական կայքին տված հարցազրույցում պատմել է իր հայրենիքի մասին, թղթի վրա նկարել Հայաստանի քարտեզը՝ Արցախի հետ։
Մխիթարյանի այս քայլն Ադրբեջանում հիսթերիա է բարձրացրել այն աստիճանի, որ այդ երկրի ֆուտբոլի ֆեդերացիան հայտարարել է՝ սա սադրանք է Ադրբեջանի նկատմամբ։
Ադրբեջանը բողոք է ներկայացրել ՈՒԵՖԱ-ին ու Իտալիայի ֆուտբոլի ֆեդերացիային՝ պահանջելով պատժել Հենրիխ Մխիթարյանին, որովհետև նա թղթի վրա նկարելով՝ Արցախը ներկայացրել է Հայաստանի մաս։
