Կարող եմ պնդել, որ իշխանության հետքն այստեղ կա. հիմա թող այլ գրառում անի Ալեն Սիմոնյանը և նորից խոստանա պատիժ այդ բանդայի համար. իրավապաշտպան

Azg.am-ի զրուցակիցն է «Լրագրողներ հանուն մարդու իրավունքների» ՀԿ նախագահ, իրավապաշտպան Ժաննա Ալեքսանյանը։

-Տիկի՛ն Ալեքսանյան, կիսո՞ւմ եք կարծիքը, որ Սամվել Վարդանյանի ծեծի, խոշտանգումների և արժանապատվությունը նվաստացնող արարքների գործը պետք է դիտարկել ԱԺ նախագահի հրապարակային հայտարարության հետ կապի մեջ (Սիմոնյանն իր տելեգրամյան ալիքում մասնավորապես գրել էր.  «Այսօր մի ոչնչություն իրեն թույլ է տվել խուլիգանական արարք հանրային տրանսպորտով երթևեկող ՀՀ ԱԺ պատգամավոր 69-ամյա Հակոբ Ասլանյանի նկատմամբ, ով, ի դեպ, երեք պատերազմի մասնակից է: Այս խուլիգանական արարքը շատ արագ արժանանալու է օրենքի ամենախիստ արձագանքին, թող հանկարծ որևէ մեկը չկասկածի»)։

-Կարծում եմ, որ այդ գրառումը կարող էր նշանակություն ունենալ, բայց չեմ կարող պնդել, որ Ալեն Սիմոնյանի գրառումից հետո է դա տեղի ունեցել։ Ամեն դեպքում ես կարող եմ պնդել, որ իշխանության հետքն այստեղ կա։ Միջադեպը տեղի է ունեցել իշխանության ներկայացուցչի՝ պատգամավորի հետ,  բայց եթե անգամ Ալեն Սիմոնյանն այդպիսի գրառում է արել, նա պարտավոր էր բացահայտել, թե ովքեր են… Եթե դա նկատի ուներ ինքը… Վստահ չեմ, որ ինքը նկատի ուներ, որ այդ բանդան պետք է հարձակվեր։ Ես հասկանում եմ, որ ինքը իրավապահ մարմիններին նկատի ուներ, բայց այլ բան տեղի ունեցավ. հիմա թող այլ գրառում անի Ալեն Սիմոնյանը և նորից խոստանա պատիժ այդ բանդայի համար։

-Տիկի՛ն Ալեքսանյան, համարո՞ւմ եք, որ կան քրեական գործ հարուցելու բոլոր հիմքերը, մինչդեռ այս պահի դրությամբ  գործ չի հարուցվել։

-Ես չգիտեմ՝ քրեական գործ հարուցվել է, թե չէ՝ նկատի ունեմ խոշտանգման փաստով։ Եթե իրենք չհարուցեն քրեական գործ և հետամուտ չլինեն այդ բացահայտմանը, ուրեմն ես կհասկանամ, որ Ալեն Սիմոնյանը հենց դրա  համար է գրել։

-Հայտնի է, որ Սամվել Վարդանյանին տեղափոխել են Շենգավիթի դատարան, իսկ դա, նրա փաստաբանների խոսքով, նշանակում է, որ դատարանին կալանավորման միջնորդություն է ներկայացվելու։ Ինչպե՞ս եք այս փաստին վերաբերում։

-Սա ուղղակի ծիծաղելի է, որ որոշել են նաև այդպես պատժել. այսինքն՝ միջադեպ է տեղի ունեցել, ոչ ոք չի տուժել։ Վիրավորանքի և այլ օրենսգրքեր կան, որոնցից պետք է օգտվել և մարդկանց համապատասխան… Ի՞նչ է նշանակում այդ թռուցիկ միջադեպի համար, որն իհարկե գովելի միջադեպ չէ, մարդուն կալանավորել։ Անցանկալի անձանց իրենք կալանավորում են, այսինքն՝ ծեծով չեն բավարարվել։

-Տիկի՛ն Ալեքսանյան, որքա՞ն կարևոր է դեպքի վրա հրավիրել միջազգային կառույցների ուշադրությունը, ապահովել վերահսկողությունը քրեական վարույթի նկատմամբ։

-Միջազգային կառույցները չեն վերահսկում քրեական գործերը, իրենք արդյունքներին կարող են տեղեկանալ։ Հայաստանում գործում են բազմաթիվ միջազգային կառույցներ և նրանց ներկայացուցչություններ, որոնք կարող են հետևել։ Նրանք կտեսնեն՝ հետո ինչ եղավ։

Այո՛, դեսպատները ևս հետևում են, այնպես որ թող սթափվեն, և իշխանությունները մտածեն, թե ինչ զեկույցների… Հիշում եք՝ Արթուր Հովհաննիսյանը  (նկատի ունի ՔՊ-ական պատգամավորին՝ խմբ.) ասում էր՝ «Freedom House»-ը չէ, որ պետք է որոշի՝ մենք ժողովրդավար ենք, թե ոչ։ Որ այդ հայտարարությունները չլինեին այդպիսի հեղինակավոր կազմակերպությունների դեմ, իրենք, փաստորեն, ինչ ուզեն՝ կանեն։ Գուցե դա են ուզում ասել։ Ես գիտեմ, որ միջազգային կազմակերպությունները միշտ էլ հետևում են։